د سولې په بهیر کې د سولې لپاره د ځوانانو د اړیکو ګروپ غوښتنې:

1- اوربند، د بین الافغاني خبرو د بهیر چټکتیا او جدي ګڼل؛

2- د افغانستان د اسلامي جمهوري نظام ساتل؛

3- د اساسي قانون ملاتړ او په اساسي قانون کې د منل شوې لارې څخه د هغه تعدیل؛

4- د اساسي قانون د دویم فصل مطابق د افغانستان د وګړو د اساسي حقونو او مسوولیتونو ساتنه؛

5- د اغېزناکه لوري په توګه د سولې په خبرو کې د نوي نسل او ځوانانو د استازو اغېزمن ګډون او تینګار کیږي، چې د سولې په بهیر کې جهادي تنظیمونه او د هغوی اړوند اشخاص، ازمویل شوي تکنوکراتان او طالبان زموږ استازي نه دي او له موږ څخه استازيتوب نشي کولای؛

6- د سولې له بهیر څخه د فرصت غوښتونکو اشخاصو او د سولې د مخالفو کسانو د ناوړه ګټې اخیستنې مخنیوی؛

7- د ښځو د زدکړې، ښوونې، کار او په سیاسي، مدني، ټولنبیز، اقتصادي او نظامي برخو کې د ښځو د فعاله ګډون څخه ملاتړ؛

8- د ولسواکۍ له بهیرونو او د قانون پر بنسټ د ټاکنو له لارې د سیاسي واک د تر لاسه کولو څخه ملاتړ؛

9- له نوماندۍ، نوماند کېدل او د رایې ورکونې له حق څخه ملاتړ؛

10- په سیاسي اقتدار کې ملي او هر اړخیز ګډون «سیاسي پلورالیسم»؛

11- د قانون په چوکاټ کې د وینا د خپلواکۍ، د مطبوعاتو، رسنیو او معلوماتو ته د لاسرسي ساتنه؛

12- د ملي او ټولییزو ارزښتونو ساتنه؛

13- د افغانستان د وسله وال ځواک (ملي اردو، ملي پولیس او ملي امنیت) ساتنه او ملاتړ او د یو ځانګړي میکانیزم پربنسټ د ملیشو، د غیر مسوول وسله والو او د طالبانو ټولو ګروپونو څخه د وسلو راټولولو لپاره د زمینې برابرول؛

14- د سولې او مذاکراتو په بهیر کې د ښځو او د افغانستان د نوي او ځوان نسل د اغیزناکه ګډون په ملاتړ د ملګرو ملتونو د امنیت شورا له لوري د یو پرېکړه لیک صادرولو لپاره هڅې؛

15- د دوه اړخیزو ملي ګټو پر بنسټ له نړیوالې ټولنې، اسلامي هیوادونو، نړیوالو بنسټونو، ګاونډیانو او د سیمې له هیوادونو سره د همکاریو او دوستانه او ستراتیژیکو اړیکو له دوام څخه ملاتړ.

په درنښت

د ویاندوی دفتر

 سولې لپاره د ځوانانو د اړیکو ګروپ