Day: October 1, 2021

د " امریکا متحده ایالتونو او طالبانو ترمنځ هوکړه لیک او د بین الافغاني خبرو پیل" 

په تړاو د یو شمېر ځوان محوره خوځښتونو او سولې لپاره د ځوانانو د اړیکو ګروپ دریځ

د سولې لپاره د ځوانانو اړیکو ګروپ، د افغانستان نوي نسل او ځوانانو ټول منلي خوځښت په توګه، چې د ۱۳۹۸ لمریز کال زمري میاشتې په ۳۱ نیټه د لسګونه ځوان محوره بنسټونو او د افغانستان د نوي نسل استازو او ځوانانو سره په همغږۍ رامنځته او د تل پاتې، سراسري سولې بنسټیزه کولو او په افغانستان کې د سولې د خبرو او مذاکراتو څخه د ملاتړ په برخه کې یې هلې ځلې کړي او په پلازمینه او ولایتونو کې یې له زرګونه ځوانانو سره سلا مشورې کړي دي.

موږ یو شمېر ځوان محوره بنسټونه، د نوي نسل فعالان او د سولې لپاره د ځوانانو د اړیکو ګروپ، له هغه خبرو او مذاکراتو څخه، چې په پایله کې یې په افغانستان سوله رامنځته او جګړه پایته ورسیږي، ملاتړ کوو؛ د سولې د بهیر د چټکېدو لپاره د لاندې مواردو غوښتونکي یو:

1. موږ د طالبانو تحریک او امریکا متحده ایالتونو ترمنځ د سولې هو کړه لیک د لاسلیک څخه هرکلي ترڅنګ غوښتنه کوو، ترڅو په بین الافغاني خبرو کې د دې هوکړه لیک پر یو شمېر برخو ھر اړ‎خیز بحث وشي۰

2. موږ په جدي ډول د طالبانو له تحریک څخه غواړو، څو د کرکې ادبیات او ناغوښتل شوې جګړه پایته ورسوي. هغه جګړه کې، چې د افغانستان خلک هره ورځ شهیدان او ټپیان ورکوي، هیڅوک فاتح نه دی. نو په دې ډول د امریکا او طالبانو ترمنځ د سولې له هوکړې وروسته، د طالبانو لخوا د افغانستان امنیتي او دفاعي ځواکونو پر وړاندې هر ډول پوځي عملیات، نه بښونکی جنایت دی.

3.  موږ د حکومت له مشرتابه او له ولسمشر څخه غواړو، چې د باور چاپیریال او ورورولۍ رامنځته کولو په موخه له هر ډول رکیکو او زشتو ادبیاتو د استعمال څخه، چې د سولې او مذاکراتو بهیر ته زیان رسوي ډډه وکړي۰

4.  ژر تر ژره اوربند او د بین الافغاني خبرو پیل: موږ د دفاعي او امنیتي ځواکونو او همدارنګه د طالبانو له تحریک څخه په جدي ډول غواړو، چې ورور وژنه ودروي او پریږدي، چې بین الافغاني خبرې پیل او مثبتې پایلې ته ورسیږي. همدارنګه موږ له ښکیلو خواوو (د افغانستان حکومت او طالبانو له تحریک) څخه غواړو، څو د یوه بل په وړاندې هر ډول برید په ټپه ودروي او د پخلاینې او تل پاتې سولې ته رسیدو په موخه هڅې وکړي۰

5. په ملي کچه د سولې هوکړې ته مشروعیت ورکولو په موخه د یوې همه شموله لویې جرګې جوړول او همدارنګه په هېواد کې د سولې او جګړې پایته رسیدو د تضمین په موخه په نړیواله کچه په یوه بې پرې هېواد کې د یوه نړیوال کنفرانس جوړول۰

6.  د افغانستان د اسلامي نظام او د جمهوريت ساتل، له اساسي قانون څخه ملاتړ او د یوه همه شمولې لویې جرګې له لارې د هغه تعدیل؛

7. د بین الافغاني خبرو لپاره د همه شمول پلاوي رامنځته کول: موږ د افغانستان له حکومت څخه غواړو، څو د بین الافغاني خبرو د پیل لپاره یو همه شموله پلاوی، چې د حکومت دننه او بهر پیژندل شویو سیاسي خوځښتونو څخه په رښتیني ډول استازیتوب وکړي او همدارنګه د افغانستان د ځوانانو او نوي نسل استازي په کې ګډون ولري.

 موږ د افغانستان له حکومت، د طالبانو له تحریک، له نړیوالې ټولنې په ځانګړې ډول د امریکا متحده ایالتونو څخه غواړو، چې ځوان نسل ته د سولې په خبرو کې د اغیزناکه ګډون ترڅنګ، د دې بهیر څخه د څارنې حق هم ورکړي. د یادونې وړ ده، چې جهادي تنظیمونه او هغوی ته اړوند شخصیتونه، ازمایل شوي تکنوکراتان او حکومتي کارکوونکي، د سولې په بهیر کې زموږ (نوي نسل) استازي نه دي او زموږ استازیتوب نشي کولای۰

8. د افغانستان د وسله وال ځواک (ملي اردو، ملي پولیس او ملي امنیت) ساتنه او ملاتړ او د یو ځانګړي میکانیزم له لارې په عمومي ډول د وسلو راټولول۰

9. له هېواده په مسوولانه ډول د بهرنیو ځواکونو له وتلو څخه ملاتړ او همدارنګه د همه شمولې لویې جرګې د پریکړو پر بنسټ د نوي پیژند پر اساس د امریکا متحده ایالتونو، نړیواله ټولنې او نړیوالو بنسټونو سره د دوستانه او استراتیژیکو اړیکو او همکاریو دوام۰

10. موږ د افغانستان له ټولو ملګرو او مرستندویه هېوادونو څخه، چې په هېواد کې سولې راوستلو په برخه کې هڅې کوي، مننه کوو. د افغانستان خلک له ګاونډیو هېوادونو سره د متقابلو ګټو پر بنسټ ښې اړیکې غواړي، خو په هیڅ ډول د سولې په بهیر کې د ناوړه لاسوهنې حق نه ورکوو. پخوانیو تجربو موږ افغانانو ته دا ثابته کړې ده، چې پاکستان هیڅکله موږ سره ریښتینی نه دی او په افغانستان کې د ریښتینې سولې پلوي نه کوي. نو په دې ډول موږ په جدي ډول د پاکستان له حکومت، په ځانګړې ډول د دې هېواد د بهرنيو چارو له وزارت څخه غواړو، څو زموږ په کورنیو چارو کې لاسوهنه و نه کړي؛

11. د یوه منطقي او منظم میکانیزم پر بنسټ د طالبانو د تحریک د زندانیانو خوشې کول: د طالب زندانیانو ازادیدل د افغانستان خلک یې اندیښمن کړي دي. نو په دې ډول موږ د افغانستان له حکومت او د امریکا د متحده ایالتونو څخه غواړو، څو د باور چاپیریال رامنځته کولو او اعتماد جوړونې په موخه د طالب زندانیانو د ازادیدو په موخه یو منظم او منطقي کړنلاره جوړه او پلي شي، څو د یادو زندانیانو ازادیدل په هېواد کې د جګړې د زیاتیدو او دوام لامل نشي او پایله یې دا شي، چې په هېواد کې پخلاینه او د ورورولۍ او سولې چاپیریال رامنځته شي؛

12. د ښځو د زدکړې او کار کولو د حق څخه د ملاتړ او همدارنګه په سیاسي، مدني، ټولنییز، اقتصادي او پوځي برخو کې د ښځو، ځوانانو او نوي نسل له ګډون څخه د ملاتړ په موخه د ملګرو ملتونو د امنیت شورا لخوا د پریکړه لیک صادرول.

په درنښت

یو شمېر ځوان محوره خوځښتونه او د سولې لپاره د ځوانانو د اړیکو ګروپ

رسنیزه غونډه – کابل - افغانستان

سه شنبه د ۱۳۹۸ لمریز کال د کب ۱۳ / د ۲۰۲۰ زیږدیز کال د مارچ ۳

د سولې او ځوانانو د غونډې پریکړه لیک – کونړ ولایت

موږ د کونړولایت یو شمېر دیني عالمان، ځوانان، ټولنییز، مدني او سیاسي فعالان او په دې ولایت کې د سولې لپاره د ځوانانو د اړیکو ګروپ ملاتړي د سولې او مذاکراتو په بهیر کې د لاندې مواردو  غوښتونکي یوو:

1. د خوښۍ او خوشالۍ ځای دی، چې د امریکا متحده ایالتونو او د طالبانو د تحریک ترمنځ د سولې خبرو په پایله کې، د افغانستان د دردېدلو خلکو لپاره د یوې اوونۍ اورکم نوی څپرکۍ رامنځته شو او موږ د دې بهیر غوښتونکي او ملاتړ کوونکي وو او یو؛

2. د سولې لپاره د ځوانانو د اړیکو ګروپ د افغانستان د اسلامي جمهوري دولت او د طالبانو د اسلامي تحریک له مشرتابه څخه د ستاینې ترڅنګ هیله مند دی، څو د امریکا متحده ایالتونو او طالبانو ترمنځ د سولې د هوکړه لیک تر لاسلیک وروسته، د بین الافغاني مذاکراتو بهیر، چې ډیر زیاد اړین دی، ژر تر ژره  پیل شي؛

3.  د کونړ ولس په څو لسیزو کی د جنګ ډیره قرباني ورکړې او ورکوي یی، نوپدی توګه د جګړې په ښکیلو خواو غږ کوي، چی سولې ته غاړه کیږدي او باید نور افغان وژنه ختمه او دايمي اوربند وشي؛

4. دا چی د جنګ یو اړخ بی روزګاره ده، د دې لپاره د کونړ ځوانان په نړیواله مرستندویه بنسټونو او خصوصي سکتورونو غږ کوي، چی د کونړ ځوانانو لپاره کاري فرصتونه برابر کړي؛

5.  موږ د کونړ ولایت ځوانان د هیواد نورو ځوانانو او نوي نسل استازي ترڅنګ د سولې په بهیر کی د ځوانانو په ګډون د سولې لپاره د ځوانانو د اړیکو ګروپ د دریځ ملاتړ څخه ملاتړ کوو او افغان دولت نړیوالې ټولنې او د طالبانو څخه غواړو څو ځوانانو ته د اغیزمن قشر په توګه د سولې په خبرو او مذاکراتو کې د رول ترڅنګ د مخامخ څارنې مسولیت ورکړل شي؛

6. د سولې په بهیر کې د نوي نسل او ځوانانو د استازو په نوم جهادي تنظیمونه او د هغوی اړوند شخصیتونه، ازمویل شوي تکنوکراتان او  حکومتي کارکونکي؛ زموږ (د ځوانانو  او نوي نسل) استازي نه دي او له موږ څخه استازيتوب نشي کولای؛

7. د کونړ ولسونه په کونړ د پاکستان توغندیز بریدونه ښکاره تیری ګڼي او ژر ترژره یې د بندیدو غوښتنه کوي.

په درنښت

یو شمېر دیني عالمان، ټولنییز، مدني او سیاسي فعالان او د سولې لپاره د ځوانانو د اړیکو ګروپ ملاتړي

کونړ - افغانستان

د ۱۳۹۸ لمریز کال د کب ۴ / د ۲۰۲۰ زیږدیز کال د فبروري ۲۳

د سولې او ځوانانو د غونډې پریکړه لیک - خوست ولایت

پرېکړه لیک

موږ د خوست ولایت ولسونه، ځوانان، ټولنییز، مدني، سیاسي او د ښځو فعالین او په دې ولایت کې د سولې لپاره د ځوانانو د اړیکو ګروپ ملاتړي د سولې او مذاکراتو په بهیر کې د لاندې مواردو  غوښتونکي یوو:

1. د خوست ولسونه او ځوانان د اورکم د اونۍ د ملاتړ تر څنګ پر ښکیلو اړخونو غږ کوي، چې د تل پاتې اوربند ته زمینه سازي وکړي؛

2. د خوست ولسونه د افغانستان پر ګاونډیو هېوادونو غږ کوي، چې نور د افغانستان په کورنیو چارو کې لاس وهنې څخه ډډه وکړي او افغانستان سوله ایز ژوند ته پریږدي؛

3.  د خوست ولسونه په نړیوالو ادارو په خاصه توګه د ملګرو ملتونو سازمان، اروپايي ټولنه، امریکا متحده ایالتونو او ګاونډیو هېوادونو باندې غږ کوي چی د افغانستان د سولې د پروسې سره ریښتينې همکاري وکړي؛

4. د خوست ولسونه او ځوانان د دایمي او تل پاتې سولې چې د ټولو افغانانو حقوق او ارزښتونو په کې ساتل شوي وي ملاتړ کوي؛

5.  د سولې خبرې باید ښکاره وي، نه دې پر دې شاته، څو ولس خپل ځان په کې وګوري؛

6.  د خوست با شعوره او ویښ ولس غواړي، چې د سولې خبرې باید په داخل د هېواد کې وي، نه په بهرنیو هېوادونو کې؛

7. د بین الافغاني خبرو د ژر تر ژره د پیلیدو تر څنګ، موږ د اوربند غوښتونکې یو؛

8. موږ د خوست ولایت ځوانان، ښځې او مدني فعالان د سولې لپاره د ځوانانو د اړیکو د ګروپ څخه بشپړ ملاتړ اعلانوو او ټینګار کوو، چې په بین الافغاني مذاکراتو کې ځوانان ګډون ولري او د افغانستان د سولې له بهیر څخه ځوانانو ته د څارنې حق ورکړل شي.

په درنښت

د خوست ولایت ولسونه، ځوانان، ټولنییز، مدني، سیاسي او د ښځو فعالین او په دې ولایت کې د سولې لپاره د ځوانانو د اړیکو ګروپ ملاتړي

خوست - افغانستان

د ۱۳۹۸ لمریز کال د کب ۳ / د ۲۰۲۰ زیږدیز کال د فبروري ۲۲

په دې غونډه کې د سولي  لپاره د ځوانانو د اړیکو ګروپ د دارالانشاء غړي انجینر توریالي هلمند، د هلمند ولایت فعال ځوان عبدالعزیز کاروان، په هلمند کې د ځوان فکر مدني ټولنې مشر نور علي نوري، استاد جان محمد شیرزاد، دیني عالم الحاج مولوی عبدالغفار، د هلمند ډاکټرانو د اتحادیې رییس ډاکټر نورمحمد، د ګرشک د ځوانانو استازي نورالله مشعل، د ښځو د حقونو فعالې شهناز فایز، په هلمند کې د ۲۱ قومونو مشر محمد نبي الفت، مدني فعالې فوزیه علومي، د هلمند پوهنتون د محصلینو اتحادیې مشر عبدالوهاب زاهدي، په هلمند کې د غور ولایت د محصلینو استازي اصف ضیاء او د فرهنګي او علمي مرکز مشر جاوید قاسمي هر یو په خپل وار سره خبرې وکړې او د سولې پر ټینګښت، د افغانانو ترمنځ د مخامخ خبرو د پیل، په هېواد کې جګړې د ښکیلو خواوو ترمنځ د ژر تر ژره اوربند پیلیدل، د سولې په بهیر کې د ځوانانو د ګډون او د ځوانانو څخه د یوه همه شموله پلاوي رامنځته کیدو په تړاو یې خبرې وکړې، څو د سولې له بهیر څخه څارنه وکړي او د غونډې پرېکړه لیک د سردار محمد سمسور له لوري ولوستل شو.

په درنښت

د ویاندوی دفتر

د سولې لپاره د ځوانانو د اړیکو ګروپ

د ۱۳۹۸  د مرغومي ۱۳ / د ۲۰۲۰ د جنوری ۳

د سولې او ځوانانو د غونډې پریکړه لیک - لغمان ولایت

پرېکړه لیک

موږ د لغمان ولایت یو شمېر دیني عالمان، ځوانان، ټولنییز، مدني او سیاسي فعالان او په دې ولایت کې د سولې لپاره د ځوانانو د اړیکو ګروپ ملاتړي؛ د سولې د خبرو او مذاکراتو بیا ځلې پیل او د لاندې مواردو غوښتونکي یوو:

1. د لغمان ولایت خلک د نورو هېوادوالو په شان د جګړې او نا امنیو له امله زیات زیانونه ګاللي، چې د دې زیانونو ډېره برخه یې د جګړې په دواړو خواوو کې ځوانان وو او دي؛ نو په دې توګه موږ ځوانان او د دې ولایت اوسېدونکي د جګړې ښکیلو خواوو (د امریکا متحده ایالتونو، د افغانستان دولت او طالبانو تحریک) ترمنځ د جګړې پای او ژر تر ژره د اوربند غوښتنه کوو؛

2. موږ د لغمان ولایت ځوانان او خلک د امریکا متحده ایالتونو او طالبانو د تحریک ترمنځ د سولې خبرو او مذاکراتو د بیا پیل غوښتنه کوو، چې په دې مذاکراتو کې د افغانستان دولت هر اړخیز پلاوی او نور اغیزناکه افغانان ګډون ولري او د تل پاتې سولې د ټینګښت لپاره د هر ډول ریښتینو هڅو څخه خپل ملاتړ اعلانوو؛

3. موږ د لغمان ولایت ځوانان د هېواد د نورو ځوانانو او نوي نسل استازو ترڅنګ، د سولې په بهیر کې د ځوانانو پر ګډون د سولې لپاره د ځوانانو د اړیکو ګروپ له دریځ څخه ملاتړ کوو او د افغانستان دولت، نړیوالې ټولنې او د طالبانو تحریک څخه غواړو، تر څو ځوانان د اغیزناکه ټولنییز قشر په توګه د سولې په مذاکراتو او خبرو کې مهم رول او د مخامخ څارنې ونډه ورکړل شي؛

4. په لغمان ولایت کې زیات شمېر ملکي خلک او کورنۍ په جګړو کې زیاتې قربانۍ ورکړي دي، موږ د جګړې له ښکیلو خواوو (حکومت او طالبانو) غواړو، تر څو د خلکو له کورونو څخه د پټنځایونو په توګه ګټه وانخلي او د بې ګناه او ملکي خلکو د قربانۍ لامل نشي؛

5. موږ د لغمان ولایت ځوانان او خلک د هغه شپنیو عملیاتو، چې په پایله کې یې ملکي او بې ګناه خلک له منځه ځي، خپل مخالفت اعلانوو او له چارواکیو، په ځانګړې توګه له امنیتي بنسټونو څخه غواړو، څو په دې برخه کې جدي پاملرنه وکړي؛

6. په لغمان ولایت کې د جګړې له امله، زیات شمېر بې ګناه خلکو او کورنیو خپل کورونه پریښي او بې ځایه شوي دي. موږ د خلکو او نورو مرستندویه بنسټونو څخه غواړو، تر څو بې ځایه شویو کورنیو ته ژر تر ژره پاملرنه وکړي؛

7. موږ د لغمان ولایت ځوانان او خلک د جګړې د ښکیلو خواوو ( افغان دولت، د امریکا متحده ایالتونو او د طالبانو تحریک) ترمنځ د باور رامنځته کولو هر ډول اقدام څخه، چې په پایله کې یې په هېواد کې تل پاتې سوله رامنځته شي، ملاتړ اعلانوو.

په درنښت

یو شمېر دیني عالمان، ټولنییز، مدني او سیاسي فعالان او د سولې لپاره د ځوانانو د اړیکو ګروپ ملاتړي

لغمان - افغانستان

د ۱۳۹۸ کال د لیندۍ ۱۵ / د ۲۰۱۹ کال د ډسمبر ۶