Ehsanullah Hikmat – Page 7 – د سولې لپاره د ځوانانو د اړیکو ګروپ

ولسي غونډه – کابل

ولسي غونډه - کابل

#سوله او #اوربند

د نوي نسل او ځوانانو یو شمېر فعالانو د پنجشنبې په ورځ د ۱۳۹۹ لمریز کال د لړم میاشتې په لومړۍ نیټه، چې د ۲۰۲۰ زیږدیز کال د اکټوبر میاشتې له ۲۲ سره برابره ده، په کابل کې د علماوو، قومي مشرانو، استادانو او ځوانانو په ګډون د سولې په اړه ولسي غونده جوړه کړه.

په پیل کې د سولې لپاره د ځوانانو د اړیکو ګروپ رئیس سنګر امیرزاده وینا وکړه او زیاته یې کړه، چې په هېواد کې د جګړې دوام د دې لامل شوی، چې پوځي او ملکي تلفاتو کچه لوړه شي او د جګړې په دواړو خواوو کې افغانان وژل کیږي. نو د مرګ ژوبلې کچې را ټیټولو لپاره ژر تر ژره اوربند ته اړتیا لیدل کیږي. د سولې لپاره د ځوانانو د اړیکو د ګروپ مرستیال خلیل احمد متین د دې ناستې له جوړونکیو په ځانګړي ډول د سولې لپاره د ځوانانو د اړیکو ګروپ له رهبري غړي ښاغلي روکی مصلح څخه د مننې ترڅنګ، په هېواد کې پر یووالي او ورورولي ټینګار وکړ او زیاته یې کړه، چې د هېواد نوی نسل او ځوانان اوسمهال تر بل هر وخت زیات مسؤلیت لري، چې د ورورولۍ فضا په رامنځته کولو سره د قومي، مذهبي او ژبني تعصباتو او شخړو له زیاتیدو څخه مخنیوی وکړي.

مولوي نصیر احمد فرقاني سوله او سوله ایز ژوند دیني وجیبه وګڼله او په هېواد کې یې د جګړې پر پایته رسیدو ټینګار وکړ. وروسته بیا یاسمین سروري د سولې په بهیر کې د ښځو د رول په اړه خبرې وکړې. د غونډې په دوام کې غلام محمد علمیار، وکیل احمد ګل طوطاخیل، محمد عظیم فکرمند، مفتي معین الدین، عجب خان ننګیال او صدیق الله قریشي د جګړې د زیانونو، د سولې ټینګښت او اهمیت او همدارنګه له طالبانو او حکومت څخه د خلکو د غوښتنو په اړه ویناوې وکړې.

نوی نسل او ځوانان؛ د سولې بهیر او بین الافغاني مذاکرات – کندهار

نوی نسل او ځوانان؛ د سولې بهیر او بین الافغاني مذاکرات - کندهار

د سولې لپاره د ځوانانو د اړیکو ګروپ د ۱۳۹۹ لمریز کال د تلې میاشتې په ۲۸ نیټه، چې د ۲۰۲۰ زیږدیز کال د اکټوبر میاشتې له ۱۹ سره برابره ده، په کندهار ولایت کې د یو شمېر ځوانانو او مدني فعالانو په ګډون «د سولې بهیر او بین الافغاني مذاکرات» اړوند مشورتي ناسته جوړه کړه.

په پیل کې د سولې لپاره د ځوانانو د اړیکو د ګروپ غړی محمد همدرد پروګرام پیل او زیاته یې کړه، چې د جګړې ښکیلې خواوې څخه هیڅ یو به یې ګټونکی نه وي، نو حکومت او طالبان باید په یوه فوري اوربند هوکړه او د دوحې خبرې دې مخ ته یوسي. د غونډې بل ګډونوال حافظ الله پوپل وايي، چې د جګړې ښکیل اړخونه نه باید خپل شخصي او ډله ایزې غوښتنې د بین الافغاني خبرو پر مهال پر یو بل وتپي. د بین الافغاني خبرو د اړیکو ډلې باید ژر تر ژره د خبرو کړنلاره وروستۍ او خبرې دې پیل شي. د غونډې بل ګډونوال عبدالمنان عاطف بیا وايي، چې د سولې په خبرو کې باید ملي ګټو ته لومړیتوب ورکړل شي. د غونډې په دوام کې شراف الدین شرافت، شګوفه عرفان او نورو ګډونوالو د سولې او بین الافغاني خبرو په تړاو خپل نظرونه او مشورې شریکې کړې او د سولې پر ټینګښت او جګړې پایته رسیدو باندې یې ټینګار وکړ.

د سولې لپاره د ځوانانو د اړیکو ګروپ مشرتابه د سولې په بهیر کې د ځوانانو او نوي نسل د واحد آدرس او غږ رامنځته کولو په موخه، تر اوسه د هېواد ۲۰ ولایتونو ته سفرونه کړي او د همدې موخې لپاره یې لسګونه پروګرامونه، د سولې ولایتي جرګې، کنفرانسونه، خبري او مشورتي ناستې او لاریونونه په لاره اچولي دي.

د جګړې ضد او د سولې فعالانو رسنیزه ناسته- ننګرهار

د جګړې ضد او د سولې فعالانو رسنیزه ناسته- ننګرهار

اعلامیه

د سولې لپاره د ځوانانو د اړیکو ګروپ، د جګړې ضد او د سولې فعالانو او ملاتړو، د ننګرهار ولایت یو شمېر ځوانانو، مدني فعالانو او د ټولنیزو بنسټونو استازو د یوې خبرې ناستې په جوړولو، په هېواد کې د جګړې پر ښکیلو خواوو غږ کوي:

1. موږ د جګړې ضد او د سولې فعالان او د ننګرهار ولایت اوسیدونکي د افغانستان د جګړې پر ښکېلو خواوو غږ کوي، چې دا بې پایلې جګړه نوره بنده کړئ. موږ نور د خپلو هېوادوالو د وژلو زغم نه لرو. موږ د جګړې له ښکیلو خواوو غواړو، څو دا افغان او ورور وژنه پایته ورسوئ او د سولې بین الافغاني خبرو د پایلې رسیدو پورې، اوربند وکړي؛

2. موږ د افغانستان له حکومت او د طالبانو له تحریک څخه غواړو، چې ژر تر ژره دې د بین الافغاني خبرو د پيل لپاره تګلاره چمتو او وروستي کړي او مخامخ خبرې دې ژر تر ژره پیل کړي. موږ همدارنګه له دواړه اړخونو څخه غواړو، چې له یو بل سره هوکړې ته ورسیږي؛

3. موږ د جګړې ضد او د سولې فعالان پر نړیوالې ټولنې په ځانګړي ډول د امریکا پر متحده ایالتونو، پر ګاونډیو هېوادونو، د اسلامي کنفرانس غړیو او د سیمې هېوادونو باندې غږ کوو، چې د افغانستان د سولې په بهیر کې ریښتیني و اوسي او د افغانستان دا نا روا جګړې پایته رسیدو لپاره دې پر افغان حکومت او د طالبانو پر تحریک خپل فشارونه زیات کړي؛

4. موږ د افغانستان له حکومت او د طالبانو له تحریک څخه غواړو، څو د کرکې له ادبیاتو څخه ګټه وانخلي. له دواړو خواوو څخه غواړو، چې په خپلو دریځونو کې نرمښت او انعطاف راولي؛

5. موږ پر نړیوالې ټولنې او افغان حکومت غږ کوو، څو د سولې په بین الافغاني مذاکراتو کې د هېواد ځوانانو ته مهم رول ورکړي، څو وکولای شوي، چې له خپلو حقونو څخه دفاع وکړي؛

6. موږ همدارنګه د افغانستان پر ځوانانو غږ کوو، چې په هېواد کې د سولې او ټیکاو راوستو لپاره خپلې هڅې لا زیاتې کړي او د هرې ممکنې لارې څخه دې د افغانستان پر حکومت او د طالبانو پر تحریک فشار راوړي، څو هوکړې ته ورسیږي.

درنښت

د جګړې ضد او د سولې فعالان

د سولې لپاره د ځوانانو د اړیکو ګروپ

د ۱۳۹۹ لمریز کال د تلې ۳۰ / د ۲۰۲۰ کال د اکټوبر ۲۱

ننګرهار – افغانستان

د پکتیا ولایت د نوي نسل او ځوانانو د سولې جرګه

د پکتیا ولایت د نوي نسل او ځوانانو د سولې جرګه

په پکتیا ولایت کې د نوي نسل او ځوانانو د سولې جرګه د ۱۳۹۹ لمریز کال د تلي میاشتې په ۲۳، چې د ۲۰۲۰ زیږدیز کال د اکټوبر میاشتې له ۱۴ سره برابره ده، د ګردیز په ښار کې جوړه شوه.

دا جرګه د دې ولایت د ۱۵ اداري واحدونو څخه د سلګونو ځوانانو او نوي نسل د استازو په ګډون، د سولې لپاره د ځوانانو د اړیکو د ګروپ لخوا جوړه شوه.

د پکتیا ولایت د نوي نسل او ځوانانو د سولې جرګې درې برخې درلودې: پرانیستنه، د کاري کمیټو کارونه، د کاري کمیټو د کارونو او پریکړه لیک لوستل. په پیل کې سید جمال الدین آصف خیل د جرګې ګډونوالو ته د ښه راغلاست ترڅنګ زیاته کړه، چې سوله د افغانستان د خلکو بنسټیزه اړتیا ده او دواړه خواوې باید سوله ایز افغانستان لپاره ریښتینې هڅې وکړي.

د سولې لپاره د ځوانانو د اړیکو ګروپ د رهبري پلاوی غړي احسان الله حکمت وايي، چې د افغانستان جګړه په کلیو کې د ښارونو په پرتله زیاته ده او د دې سیمو خلکو له جګړې څخه ډیر زیانونه لیدلي دي. نوموړي همدارنګه د جګړې پر ښکیلو خواوو غږ وکړ، چې د کرکې او جګړې ادبیاتو له کارولو څخه ډډه وکړي او خپلو دریځونو کې دې نرمښت څرګند کړي. د جرګې د پرانیست برخې په دوام کې عبدالقدیر حماس، جمعه ګل افغان، خالد ځدران، احمدالله احمدي او اصغر مجاهد ځاځي ویناوې وکړې.

د جرګې په دویمه برخه کې، د کاري کمیټو کارونه پیل او د جرګې غړیو د شپږو مشخص شویو موضوع ګانو په اړه خبرې او بحث وکړ. د جرګې د غړیو نظرونو توحید او د پروګرام په درېیمه برخه کې د هرې کمیټې د مسؤل لخوا وړاندې شوې. په همدې حال کې د لسګونو کمیټو منشیانو د پکتیا ولایت د نوي نسل او ځوانانو د سولې جرګې پریکړه لیک جوړ او ولوستل شو.

د پکتیا ولایت د نوي نسل او ځوانانو د سولې جرګې پریکړه لیک

د نوي نسل او ځوانانو د سولې جرګه د ۱۳۹۹ لمریز کال د تلې ۲۳، چې د ۲۰۲۰ زیږدیز کال د اکټوبر میاشتې له ۱۴ سره برابره ده، د پکتیا ولایت د سلګونو ځوانانو په ګډون جوړه شوه. دا جرګه د سولې لپاره د ځوانانو د اړیکو ګروپ لخوا جوړه شوې وه، چې په کې د دې ولایت له ۱۵ اداري واحدونو څخه د نوي نسل او ځوانانو استازو ګډون کړی وو او د افغانستان له حکومت، د طالبانو له تحریک او نړیوالې ټولنې په ځانګړې ډول د امریکا متحده ایالتونو څخه یې خپلې غوښتنې او پریکړې په لاندې ډول بیان کړې:

۱. افغان ځوانانو ته دې په مذاکراتي ډله کې ګډون ورکړل شي او د ځوانانو تیرو شل کلنو لاسته راوړنې دې قرباني نه کړي؛

۲. اسلامي شریعت باید له نظره و نه غورځول شي او د سولې هوکړه لیک دې د اسلامي اصولو په رڼا کې ترسره شي؛

۳. د سولې بهیر دې همه شموله وي؛

۴. د افغانستان حکومت او طالبان دې په خپلو دریځونو کې نرمښت او انعطاف څرګند کړي او یو بل ته دې د ورور په سترګه وګوري؛

۵. د افغانستان له حکومت څخه غواړو، څو د سولې بهیر کې شهیدانو او د جګړې قربانیانو کورنیو ته دې ونډه ورکړي؛

۶. افغان حکومت دې د هغه کسانو مخه ډب کړي، چې د سولې په بهیر کې شخصي ګټو ته ارجحیت ورکوي؛

۷. د جمهوریت پر نظام دې معامله ونشي او تل پاتې اوربند دې وشي؛

۸. افغان ځوانان دې په خپلواک ډول له طالبانو سره مخامخ خبرې وکړي او د طالبانو له تحریک، افغان حکومت او نړیوالې ټولنې څخه غواړو، څو له طالبانو سره د افغان ځوانانو د مخامخ خبرو ترسره کولو لپاره زمینه مساعده کړي؛

۹. د سولې بهیر دې له طالبانو سره په ریښتیني ډول پر مخ یوړل شي او ملي ګټې دې له پامه و نه غورځول شي؛

۱۱. له طالبانو غواړو، څو ژر تر ژره اوربند وکړي او د جګړې له دواړو ښکیلو خواوو غوښتنه کوو، څو د افغانانو له وژلو، چې د هېواد دښمنان ورڅخه ګټه اخلي؛ لاس واخلي.

۱۲. د طالبانو له تحریک څخه غواړو، څو د اسلام له نظره د ښځو حقونه دې د سولې مذاکراتو پر مهال په پام کې ونیسي او اجازه ورکړي، څو هغوی تعلیم او کار وکړي؛

۱۳. د طالبانو له تحریک څخه غواړو، څو د افغانستان ملي شتمني «ښوونیز مرکزونه او ټول ګټې پروژې» خرابې نکړې او اجازه ورکړي، څو ټول ګټې پروژې بشپړې شي؛

۱۴. له افغان حکومت او طالبانو له تحریک څخه غواړو، څو په ګډه د ملکي وګړیو او افغانانو د وژنې او زورونې مخنیوی وکړي؛

۱۵. له طالبانو څخه غواړو، څو د پردیو او ګاونډیو هېوادونو تر فشار لاندې را نشي او خپلې اړیکې دې له ټولو ترهګریزو ډلو سره پرې او په خپلواک ډول دې پریکړې وکړي؛

۱۶. د امریکا متحده ایالتونو، اسلامي هېوادونو او ګاونډیو هېوادونو څخه غواړو، څو د افغانستان د سولې په بهیر کې ریښتیني و اوسي او دا بهیر دې بریالیتوب ته ورسوي او همدارنګه له دوی څخه غواړو، څو خپلو مرستو ته دوام ورکړي؛

۱۷. له نړیوالې ټولنې څخه غواړو، څو له هر ډول ګټو پرته دې د افغانستان د سولې له بهیر څخه ملاتړ وکړي او پر افغان حکومت او طالبانو دې فشار راوړوي، څو دا بهیر بریالی شي؛

۱۸. د امریکا متحده ایالتونو څخه غواړو، څو د هر ډول بهرنیو لاسوهنو څخه، چې د افغانستان سولې بهیر له خنډ سره مخ کوي، مخنیوی وکړي؛

۱۹. د سولې په بهیر کې دې ځوانان بیلابیل پروګرامونه په لاره واچوي، او په طالبانو او حکومت دې فشار واچول شي، څو مذاکرات بریالي شي؛

۲۰. نړیواله ټولنه، اسلامي او ګاونډي هېوادونه دې د سولې هوکړې د پلي کولو تضمین وکړي؛

۲۱. پکتیا ولایت د جګړو له امله ځپل شوی او د دې ولایت ټولو وګړيو ژوند له ګواښ سره مخ او بیلابیلو اقتصادي، ښوونیزو، کرنیزو او پراختیايي برخو کې زیان لیدلی دی.

۲۲. د افغانستان په کچه د ملي اجماع رامنځته شي، څو د سولې له بهیر څخه څارنه وکړي.

و من الله توفیق

د نوي نسل او ځوانانو د سولې جرګه

پکتیا – افغانستان

د ۱۳۹۹ لمریز کال د تلې ۲۳ / د ۲۰۲۰ زیږدیز کال د اکټوبر ۱۴

د بلخ ولایت د نوي نسل او ځوانانو د سولې جرګه

د بلخ ولایت د نوي نسل او ځوانانو د سولې جرګه

په بلخ ولایت کې د نوي نسل او ځوانانو د سولې جرګه د ۱۳۹۹ لمریز کال د تلي میاشتې په ۹، چې د ۲۰۲۰ زیږدیز کال د سپټمبر میاشتې له ۳۰ سره برابره ده، د مزار شریف په ښار کې جوړه شوه.

د بلخ ولایت د نوي نسل او ځوانانو د سولې جرګه درې برخې درلودې: پرانیستنه، د کاري کمیټو کارونه، د کاري کمیټو د کارونو او پریکړه لیک لوستل. په پیل کې فروزان آریا پروګرام پیل او وروسته بیا د سولې لپاره د ځوانانو د اړیکو د ګروپ رئیس محمد سنګر امیرزاده د سولې په بهیر کې د ځوانانو پر مسوولیتونو د ټینګار ترڅنګ زیاته کړه، چې سوله د ټول غوښتنو او انحصار په مانا نه ده، د جګړې ښکیلې خواوې باید له نرمښت څخه کار واخلي او داسې پراخ بنسټه هوکړې ته ورسیږي، چې په هېواد کې د جګړې له دوام څخه مخنیوی وکړي. د جرګې د پرانیست برخې په دوام کې د سولې لپاره د ځوانانو د اړیکو ګروپ مرستیال خلیل احمد متین، نصیره ثمر، هجرت الله همدرد، ډاکټر محمد حنیف لطفي، ریحانه رابع، سید اسماعیل بلخي، اجمل آرین او استاد محمد نسیم مومند ویناوې وکړې.

د جرګې په دویمه برخه کې، د کاري کمیټو کارونه پیل او د جرګې غړیو د شپږو مشخص شویو موضوع ګانو په اړه خبرې او بحث وکړ. د جرګې د غړیو نظرونو توحید او د پروګرام په درېیمه برخه کې د هرې کمیټې د مسؤل لخوا وړاندې شوې. په همدې حال کې د لسګونو کمیټو منشیانو د بلخ ولایت د نوي نسل او ځوانانو د سولې جرګې پریکړه لیک جوړ او ولوستل شو.

د بلخ ولایت د نوي نسل او ځوانانو د سولې جرګې پریکړه لیک

د نوي نسل او ځوانانو د سولې جرګه د ۱۳۹۹ لمریز کال د تلې میاشتې په ۹ نیټه، چې د ۲۰۲۰ زیږدیز کال د سپټمبر میاشتې له ۳۰ سره برابره ده، په بلخ ولایت کې د سلګونو ځوانانو په ګډون جوړه شوه. دا جرګه د سولې لپاره د ځوانانو د اړیکو ګروپ لخوا جوړه شوې وه، چې په کې د دې ولایت د ۱۵ اداري واحدونو د نوي نسل او ځوانانو استازو ګډون کړی وو او خپلې پریکړې او غوښتنې یې د افغانستان له حکومت، د طالبانو له تحریک او نړیوالې ټولنې په ځانګړي ډول د امریکا متحده ایالتونو څخه په لاندې ډول کړې:

1.موږ د سولې په بهیر کې د ځوانانو د ریښتینو استازو د ګډون غوښتونکي یو؛

2.موږ د سولې بهیر کې د ښکیلو خواوو څخه د ملي ګټو، اسلامي او انساني ارزښتونو په رڼا کې د وروستیو دوه لسیزو لاسته راوړنو د ساتلو غوښتونکي یو؛

3.موږ د سراسري، تل پاتې او با عزته سولې غوښتونکي یوو، چې په کې د اسلامي او انساني ارزښتونو ساتنه او د وګړیو، د ښځو حقونه، قومي، مذهبي توپیرونه او د لږکیو حقونه رعایت شي؛

4.موږ له ښکیلو اړخونو؛ له افغان حکومت او د طالبانو له تحریک څخه غواړو، څو د سولې په خبرو کې له ځانه نرمښت وښيي او ټولییز هوکړې ته د رسیدو لپاره په ریښتیني ډول هڅه وکړي؛

5.موږ د طالبانو له تحریک څخه غواړو، څو د وګړیو حقونو او مذهبي او قومي توپیرونو ته درناوی وکړي او خپل فردي او ډله ایزې غوښتنې پر نورو و نه تپي؛

6.موږ د طالبانو له تحریک څخه غواړو، څو د افغانستان خلکو د دوه وروستیو لسیزو لاسته راوړنو ته درناوی وکړي او د سولې په خبرو کې خپل نیک نیت څرګند کړي؛

7.موږ له ښکیلو خواوو څخه غواړو، څو پراخ بنسټه، ګډ او سراسري حکومت د جوړولو لپاره، چې په کې د افغانستان د خلکو مادي او معنوي ارزښتونه خوندي وي، هڅه وکړي؛

8.موږ د جګړې له ښکیلو خواوو څخه غواړو، څو د اسلام مبارک دین او عام وګړیو څخه د سولې په خبرو کې ناوړه ګټه وا نخلي؛

9.موږ د طالبانو له تحریک څخه غواړو، څو خپل مرکچي پلاوي ټول شموله جوړ کړي، چې په کې ښځې او ځوانان په فعال او اغیزناکه ډول ګډون ولري؛

10.موږ له نړیوالې ټولنې او د افغانستان د سولې په بهیر کې له ښکیلو هېوادونو په ځانګړي ډول د امریکا له متحده ایالتونو څخه غواړو، څو د سولې بهیر اجرايي تضمین ورکړي؛

11.موږ له خپلو نړیوالو همکارانو څخه غواړو، څو د افغانانو د خپل منځي خبرو پایلې ته رسیدو لپاره، د جګړې پر ښکیلو خواوو دیپلوماتیک فشار وارد کړي؛

12.موږ د امریکا له متحده ایالتونو او نړیوالو همکارانو څخه غواړو، څو په افغانستان کې قراردادي د سولې هوکړه و نه کړي او تل پاتې سولې ته د رسیدو لپاره د افغانستان له خلکو سره مرسته وکړي؛

13.موږ له خپلو نړیوالو همکارانو څخه غواړو، څو د جګړې د قربانیانو کورنیو څخه ملاتړ او ښوونیزې مرستې وکړي؛

14.موږ له ګاونډیو هېوادونو څخه غواړو، څو زموږ په کورنیو چارو کې لاسوهنه و نه کړي او پریږدي، چې افغانان په خپلواک ډول تل پاتې هوکړې ته ورسیږي؛

15.موږ له اسلامي او خپلو ګاونډیو هېوادونو څخه غواړو، څو هغه هوکړې ته درناوی وکړي، چې د افغانانو خپل منځي خبرو کې ترلاسه کیږي او له سیاسي او استخباراتي لاسوهنو څخه ډډه وکړي؛

16.د افغانستان د نوي نسل د همپالني او همغږۍ په موخه د ځوانانو د سولې مشورتي جرګو جوړول؛

17.موږ د سولې خبرو څخه د څارنې په موخه د ځوانانو د استازو د خپلواک او ځانګړي کمیسیون جوړول غواړو؛

18. د سولې نه شتون له امله د افغانستان خلک په ځانګړي ډول د بلخ ولایت خلک د ګڼ شمېر ستونزو لکه: نا امني، وزګاري، نفاق ته لمن وهل، قومي تعصب ته لمن وهل، د غیر مسؤلو وسله والو زیاتوالی، په رڼا ورځ کې غلاوې، د ښوونیزو او عام المنفعه ځایونو ورانول، د ملکي او پوځي مرګ ژوبلې زیاتوالی، د عشر او ذکات په نوم له خلکو څخه باج اخیستل، د لویو لارو نا امني، له زدکړو څخه د ځوانانو بې برخه کیدل او ویرې سره مخ دي، چې روحي او رواني ناروغیو د رامنځته کیدو لامل شوی.

19.د افغانانو خپل منځي خبرو څخه د افغانستان خلکو خبرولو په موخه، په بې ساري ډول د رسنیو ګډون.

په درنښت

د بلخ ولایت د نوي نسل او ځوانانو جرګه

د۱۳۹۹ د تلې ۹ / د ۲۰۲۰ زیږدیز کال د سپټمبر ۳۰

د سمنګان ولایت د نوي نسل او ځوانانو جرګه

د سمنګان د نوي نسل او ځوانانو د سولې جرګه

د نوي نسل او د ځوانانو جرګه د ۱۳۹۹ لمریز کال د تلي میاشتې په ۳ نیټه، چې د ۲۰۲۰ زږدیز کال د سپټمبر میاشتې له ۲۴ سره برابره ده، د سمنګان ولایت د سلګونه ځوانانو په ګډون په دې ولایت کې جوړه شوه. د سمنګان ولایت د نوي نسل او ځوانانو جرګه، د هېواد په کچه نوولسم پروګرام ده، چې د سولې لپاره د ځوانانو د اړیکو د ګروپ او د سمنګان ولایت د فعاله ځوانانو په زیار جوړیږي.

په دې جرګه کې د دې ولایت د ۷ اداري واحدونو څخه د ځوانانو او نوي نسل استازو ګډون کړی وو. دې جرګې درې برخې لرلي: پرانیستنه، د کاري کمیټو کارونه، د کمیټو د نظرونو وړاندې کول او د پریکړه لیک لوستل وو، چې په پیل کې د پوهنتون استاد ضیاءالدین جهیش د سمنگان ولایت د ځوانانو په استازیتوب د دې ولایت د ځوانانو ترمنځ د یووالي او همپالنې په تړاو خبرې وکړې او د سولې له بهیر څخه یې ملاتړ وکړ. د جرګې په پرانیست برخه کې د سولې لپاره د ځوانانو د اړیکو ګروپ مشر محمد سنګر امیرزاده د جرګې له جوړونکیو څخه د مننې ترڅنګ زیاته کړه، چې د ځوانانو یووالي او انسجام د دې لامل کیږي، چې د افغانستان نوی نسل د راتلونکي تحول کې مهم او بنسټیز رول ولري. نوموړي همدارنګه د افغانستان د جګړې له ښکیلو اړخونو وغوښتل، چې د افغانستان جګړه مشروعیت نه لري او پر اوربند هوکړه وکړي او په هېواد کې د ورور وژنې دوام مخنیوی وکړي.

وروسته بیا شکیلا حنفي خبرې وکړې او زیاته یې کړه، چې سوله او ټیکاو د هېواد د پراختیا او پرمختګ لامل ده او ټينګار یې وکړ، چې د جګړې د ښکیلو اړخو منځ کې باید سوله پیاوړې او دود شي.

د پرانیست برخې په دوام کې د سولې لپاره د ځوانانو د اړیکو ګروپ مرستیال خلیل احمد متین د ځوانانو پر یووالي او همغږۍ د ټینګار ترڅنګ د افغانستان له حکومت او طالبانو له تحریک څخه وغوښتل، څو خپل کارونکیو ادبیاتو کې بدلون راوړي او د افغانستان دیني، مذهبي، فکري او قومي توپیرونه په پام کې ونیسي او د سولې په خبرو کې خپل شخصي او ډله ایزې غوښتنې پر یو بل و نه تپي.

د جرګې په دویمه برخه کې کاري کمیټو د شپږو ځانګړیو شویو موضوع ګانو په تړاو بحث او خبرې وکړې او خپلې غوښتنې او اندیښنې یې له یو بل سره شریک او راټولې کړې. د جرګې په درېیمه برخه کې د کاري کمیټو مسوولینو د خپلو کمیټو نظرونه وړاندې او د لسګونه کمیټو منشیانو د سمنګان ولایت د نوي نسل او ځوانانو جرګې پریکړه لیک جوړ او ولوستل شو.

د جرګې په پای کې، د سولې لپاره د ځوانانو د اړیکو د ګروپ مشرتابه د جرګې ټولو ګډونوالو ته د سولې د سفیرانو تصدیق پاڼه تفویض کړه او د سمنګان ولایت د جرګې له جوړونکیو څخه یې مننه او ستاینه وکړه.

د سولې لپاره د ځوانانو د اړیکو ګروپ د کړنلارې پر بنسټ، د جرګې پریکړه لیک درې آدرسونو؛ د افغانستان حکومت، د طالبانو تحریک او نړیوالې ټولنې په ځانګړې ډول د امریکا متحده ایالتونو سره شریک کیږي. په همدې بنسټ د سمنګان ولایت د نوي نسل او ځوانانو جرګې په پای کې، د دې جرګې پریکړه لیک د نوي نسل او ځوانانو د جرګې د جوړونکیو، د لسګونو کاري کمیټو د مسؤلینو او منشیانو لخوا د د افغانستان اسلامي جمهوريت د استازي په توګه د سمنګان ولایت مقام ته وسپارل شوو.

د نوي نسل او ځوانانو د سولې جرګې پریکړه‌لیک - سمنګان

د سمنګان ولایت د نوي نسل او ځوانانو د سولې جرګه د ۱۳۹۹ لمریز کال د تلې په ۳ نېټه د دې ولایت د سلګونو ځوانانو په ګډون جوړه شوه. دا جرګه د سولې لپاره د ځوانانو د اړیکو ګروپ لخوا جوړه شوې وه، چې پدې جرګه کې د سمنګان ولایت د ۷ اداري واحدونو څخه د نوي نسل او ځوانانو استازو ګډون درلود او خپلې غوښتنې او پریکړې یې د افغانستان حکومت، د طالبانو تحریک او له نړیوالې ټولنې په ځانګړي توګه د امریکا متحده ایالتونو څخه په لاندې ډول بیان کړې:

۱. موږ د دواړو مذاکرکونکو ټیمونو څخه غواړو، چې ځوانان له سولې وروسته په راتلونکي حکومت کې بنسټیز رول ولري؛

۲. د جګړې پایته رسیدل او دایمي اوربند زموږ له مهمو غوښتنو څخه دی؛

۳. په نرمښت د مرکچي پلاوو ترمنځ د خبرو ترسره کیدل او د کرکې او زورزیاتي د ادبیاتو نه کارول؛

۴. د سولې خپل منځي خبرو د ترسره کونکیو لخوا ټولو مذهبونو ته درناوی؛

۵. د افغانانو د خپل منځي خبرو پایلې ته رسیدو لپاره د نړیوالې ټولنې د فشار راوړل؛

۶. د طالبانو تحریک پر پوځي ملاتړ کوونکیو هېوادونو د نړیوالې ټولنې د فشار راوړل؛

۷. د وروستیو ۱۹ کلونو د لاسته راوړنو ساتنې ته د مذاکره کوونکو لخوا ژمنتوب؛

۸. موږ د دواړو خواوو له مرکچیانو څخه غواړو، چې د سولې بهیر کې ترلاسه شوی فرصت د ډله اییزو او شخصي ګټو قرباني نه کړي؛

۹. موږ له ځوانانو څخه غواړو، چې د سولې په بهیر کې مرسته وکړي؛

۱۰. موږ له حکومت څخه غواړو، چې د سولې بهیر تر پای ته رسیدو پورې د تاوتریخوالي کمولو په موخه امنیتي ځواکونه پیاوړي او ملاتړ ترې وکړي.

۱۱. موږ له ګاونډیو هېوادونو څخه غواړو، چې د افغانستان خلکو سره د سولې په بهیر کې مرسته وکړي او د سولې په بهیر کې له لاسوهنو څخه ډډه وکړي؛

۱۲. موږ له دواړو خواو څخه غواړو، چې د شخصي او فردي ګټو په پرتله د هېواد ملي ګټې غوره کړي؛

۱۳. موږ د طالبانو تحریک څخه غواړو، چې سولې ته رسیدو لپاره خپل حسن نیت، په عمل کې وښيي.

۱۴. امریکا متحده ایالاتونه باید د سولې په بهیر کې حسن نیت ولري، د سولې په بهیر کې ریښتني عمل وکړي او د سولې په بهیر کې د افغانستان د خلکو ګټې په پام کې ونیسي؛

۱۵. موږ له دواړو مرکچي پلاوو څخه غواړو، چې د سولې په خبرو کې له خپلو دریځونو څخه تېر شي او د ځان غوښتنې او پر یو بل د خپلو دریځونو منلو او تحمیل څخه ډډه وکړي؛

۱۶. موږ له نړیوالې ټولنې څخه غواړو، چې د سولې خبرو څخه د څارنې په موخه د متخصصو، تجربه لرونکو، د باسواده ځوانانو، ښځو او د ټولنې زیانمنو کسانو څخه د یوه ګډ کمیسیون له جوړیدو ملاتړ وکړي؛

۱۷. موږ داسې سوله غواړو، چې اسلامي، فرهنګي، ملي او انساني ارزښتونه له لاسه ورنکړو؛

۱۸. موږ له افغان حکومت څخه غواړو، چې د کابل ـ سمنګان د لویې لارې د امنیت ټینګښت ته جدي پاملرنه وکړي. په همدې حال کې د طالبانو تحریک څخه غواړو، چې د خپل واک په سیمو کې له ویرې پرته د خلکو تګ راتګ ته زمینه برابره کړي.

درنښت

د سمنګان ولایت د نوي نسل او ځوانانو د سولې جرګه

۱۳۹۹کال د تلې ۳ / د ۲۰۲۰ کال د سپټمبر ۲۴

د بامیان د نوي نسل او ځوانانو د سولې جرګه

په بامیان ولایت کې د سولې لپاره د ځوانانو د اړیکو ګروپ لخوا د ۱۳۹۹ لمریز کال د وږي میاشتې په ۲۵ نیټه، چې د ۲۰۲۰ زیږدیز کال د سپټمبر میاشتې له ۱۵ سره برابره ده، د نوي نسل او ځوانانو د سولې جرګه جوړه شوه. دا جرګه د دې ولایت د اته اداري واحدونو څخه د سلګونو ځوانانو په ګډون جوړه شوې وه.

یادې جرګې درې برخې درلودې: د جرګې پرانیستنه، د کاري کمیټو کارونه، د ترسره شویو بحثونو وړاندې کیدل او وروستۍ، د پریکړه لیک لوستل وو. دا جرګه د سولې لپاره د ځوانانو د اړیکو د ګروپ مرستیال خلیل احمد متین په وینا پیل او نوموړي د سولې په بهیر کې د ځوانانو پر ګډون ټینګار وکړ. هغه زیاته کړه، چې اوس مهال د سولې په بهیر کې بې سارې فرصت ترلاسه شوی او د جګړې ښکیلې خواوې باید د افغانستان د بې پایلې جګړې پایته رسیدو لپاره له دې فرصت څخه ګټه واخلي. د جرګې لومړۍ برخې په دوام کې د سولې لپاره د ځوانانو د اړیکو ګروپ رئیس محمد سنګر امیرزاده د اړیکو د ګروپ فعالیتونو په اړه رڼا واچوله او ټینګار یې وکړ، چې د افغانستان جګړه هیڅ ګټونکی نه لري او هیڅوک نشي کولای نور حذف کړي. همدارنګه د سولې لپاره د ځوانانو د اړیکو ګروپ د دارالانشا غړی وحیدالله سهیل، محمد عالم فاضل، نظیفه حیدري، وحیده سمر، امیر کوثري او سید عزیز فرهمند د سولې پر اهمیت او په دې بهیر کې د ځوانانو پر مسوولیتونو خبرې وکړې. د جرګې د پرانیستنې په بله برخه کې د بامیان ولایت د سمر آشیانه ماشومانو د سولې سندره وغږوله او د جرګې دویمه برخه پیل شوه.

د جرګې په دویمه برخه کې د کاري کمیټو کارونه پیل او د جرګې غړیو د شپږو ځانګړیو شویو موضوع ګانو په تړاو بحث او خبرې وکړې. د جرګې د غړیو نظرونه توحید او په درېیمه برخه کې د هرې کمیټې د مسوولینو لخوا وړاندې شول. په همدې حال کې د لسګونه کمیټو منشیانو د بامیان ولایت د نوي نسل او ځوانانو د سولې جرګې وروستۍ پریکړه لیک جوړ او ګډونوالو ته وړاندې شو.

د بامیان ولایت د نوي نسل او ځوانانو د سولې جرګې پریکړه‌لیک

د نوي نسل او ځوانانو د سولې جرګه د ۱۳۹۹ لمریز کال د وږي په ۲۵، چې د ۲۰۲۰ زیږدیز کال د سپټمبر له ۱۵ سره برابره ده، د بامیان ولایت د سلګونو ځوانانو په ګډون جوړه شوه. دا جرګه د سولې لپاره د ځوانانو د اړیکو ګروپ لخوا جوړه شوې وه، چې په کې د دې ولایت له ۸ اداري واحدونو څخه د نوي نسل او ځوانانو استازو ګډون کړی وو او د افغانستان له حکومت، د طالبانو تحریک او نړیوالې ټولنې په ځانګړې ډول د امریکا متحده ایالتونو څخه یې خپلې غوښتنې او پریکړې په لاندې ډول بیان کړې.

۱. موږ د جګړې له ښکیلو خواو څخه د ژر تر ژره اوربند غوښتنه کوو؛

۲. موږ په افغانستان کې د وروستیو شلو کلنو لاسته راوړنو، د خلکو رايو پر بنسټ او د جمهوریت نظام ساتنه، په اساسي قانون کې د وګړیو د بنسټیزو حقونو او د دیني قوانینو د اعتدال، د لږکیو، د محرومو وګړیو او د ښځو حقونو د ساتنې غوښتونکي یو؛

۳. موږ د سولې په بهیر کې د ځوانان د اغیزناکه ګډون غوښتونکي یو؛

۴. موږ د جګړې له ښکیلو خواو څخه غواړو، څو ملي ګټو ته لومړیتوب ورکړي او د ترلاسه شوي فرصت څخه د دوامداره او با عزته سولې لپاره ګټه واخلي؛

۵. موږ د جګړې له ښکیلو اړخونو څخه غواړو، چې د خبرو پر مهال ملي ګټې په پام کې ونیسي، پر یو بل د بریالیتوب هڅه دې نه کوي او دواړه لوري دې په خبرو کې نرمنښت څرګند کړي؛

۶. موږ د طالبانو تحریک، د افغانستان حکومت او سیاستوالو څخه غواړو، چې د سولې په بهیر کې رښتیني و اوسي او په خپلواک ډول او د بهرنیو له فشار پرته دې عمل وکړي؛

۷. موږ له ګاونډیو او د سولې په بهیر کې له ښکیلو هېوادنو څخه غواړو، چې له فشار اچولو او لاسوهنې څخه ډډه وکړي او افغانان پریږدي، چې خپل راتلونکی په خپله وټاکي؛

۸. موږ له خپلو نړیوالو ملګرو څخه غواړو، چې له افغانستان سره دې خپلو مرستو ته دوام ورکړي او نه دې پرېنږدي، چې په افغانستان کې نوې ترهګریزې ډلې رامنځته شي؛

۹. موږ د امریکا له متحده ایالاتونو او نورو نړیوالو او سیمه ایزو ملګرو څخه غواړو، چې پایلې ته د بین الافغاني خبرو رسیدو پورې د بیلابیلو برخو په ځانګړي ډول د پوځي او امنیتي ځواکونو ملاتړ په برخه کې خپلو مرستو ته دوام ورکړي او د افغانستان خلک دې یوازې نه پریږدي؛

۱۰. موږ د افغانستان له نوي نسل او ځوانانو څخه غواړو څو په هېواد کې د سولې د ټینګښت په برخه کې خپل رول ترسره او د سولې بهیر څخه ملاتړ او څارنه وکړي.

۱۱. موږ د طالبانو تحریک او د افغانستان حکومت څخه غواړو، څو د کابل ــ بامیان لویې لارې امنیت ته جدي پاملرنه وکړي او په لارو کې د عامو خلکو د تلاشي کولو او زورونې مخنیوی وکړي؛

۱۲. موږ له مرکزي حکومت څخه غواړو، څو د مالي سرچینو د ځانګړي کولو په برخه کې دې د متوازنې پراختیا اصل په پام کې ونیسي او ځوانانو ته دې د کارموندنې په برخه کې اړین ګامونه اوچت او د کډوالۍ او نورو هغه لاملونو، چې د جګړې د زیاتیدو لامل کیږي، مخنیوی وکړي؛

۱۳. موږ د جګړې له ښکیلو اړخونو او نړیوالې ټولنې څخه غواړو، څو د سولې په بهیر کې د باور جوړونې او روڼوالي په موخه، ملي او بې پرې بنسټونو، رسنۍ، مدني ټولنو او د بشري حقونو بنسټونو ته د سولې له بهیر څخه د څارنې زمینه برابره کړي.

په درنښت

د بامیان ولایت د نوي نسل او ځوانانو د سولې جرګه

۱۳۹۹ لمریز کال د وږې ۲۵ / د ۲۰۲۰ کال د سپټمبر ۱۵

د بدخشان د نوي نسل او ځوانانو د سولې جرګه

د بدخشان د نوي نسل او ځوانانو د سولې جرګه

د بدخشان ولایت د نوي نسل او ځوانانو د سولې جرګه د ۱۳۹۹ لمریز کال د وږي میاشتې په ۱۶ نیټه، چې د ۲۰۲۰ زیږدیز کال د سپټمبر میاشتې له ۶ سره برابره ده، د سولې لپاره د ځوانانو د اړیکو ګروپ لخوا جوړه شوه. په دې جرګه کې د دې ولایت د ۲۸ اداري واحدونو څخه سلګونه ځوانانو ګډون کړی وو.

د بدخشان د نوي نسل او ځوانانو د سولې جرګې درې برخې درلودې، چې لومړۍ برخه یې د جرګې پرانیستنه وه، چې په کې د سولې لپاره د ځوانانو د اړیکو ګروپ مرستیالې عطیه مهربان، د اړیکو د ګروپ رئیس محمد سنګر امیرزاده، د اړیکو د ګروپ مرستیال خلیل احمد متین، سید نورالله باعث، آصفه کریمي او ستورۍ یزدان پرست ویناوې وکړې.

دویمه برخه کې د کمیټو کارونه او دریمه برخه کې د کاري کمیټو وړاندیزونه او غوښتنې وې، چې د کمیټو د مسؤلینو لخوا وړاندې شول. همدارنګه د جرګې د لسګونه کمیټو منشیانو د بدخشان ولایت د نوي نسل او ځوانانو د سولې جرګې پریکړه لیک جوړ او وړاندې کړ.

په پای کې د سولې لپاره د ځوانانو د اړیکو د ګروپ لخوا د جرګې ټولو ګډونوالو ته "د سولې سفیر" لقب ورکړل شو.

د سولې لپاره د ځوانانو د اړیکو د ګروپ مشرتابه د دې جرګې د جوړونکي ډلې څخه ستاینه وکړه او د هغوی د نه ستړي کیدونکیو هلو ځلو څخه مننه کوي.

د بدخشان ولایت د نوي نسل او ځوانانو د سولې جرګې پریکړه لیک

موږ د بدخشان ولایت ځوانان د بدخشان د نوي نسل او ځوانانو د سولې په جرګه کې، چې د ۱۳۹۹ لمریز کال د وږي میاشتې په ۱۶ نیټه، چې د ۲۰۲۰ زیږدیز کال د سپټمبر میاشتې له ۶ سره سمون خوري، د سولې لپاره د ځوانانو د اړیکو ګروپ لخوا جوړه شوې وه، ګډون کړی او د سولې په بهیر کې د افغانستان حکومت، د طالبانو تحریک او نړیوالې ټولنې څخه د بدخشان ولایت ځوانانو غوښتنې، په هېواد کې د جګړې پایته رسیدو پر څرنګوالي او په دې ولایت کې له جګړې څخه د را ټوکیدلو زیانونو په اړه خبرې او لاندې پریکړې وکړې:

۱. موږ ځوانان د پراخ بنسټه او ټول شموله سولې غوښتونکي یوو، چې د اسلامي او انساني ارزښتونو پر بنسټ رامنځته شي؛

۲. موږ د سولې په بهیر کې د ځوانانو د اغیزناکه ګډون غوښتنه کوو؛

۳. موږ د اساسي قانون د ساتنې، د سولې په بهیر کې د بیلابیلو قومونو د ګډون، د ۱۹ کالو د لاسته راوړنو ساتنه، عدالت، یوشانوالي او د سولې په بهیر کې د مختلفو قومونو د ګډون غوښتنه کوو؛

۴. موږ د افغانستان له حکومت څخه غواړو، څو سولې ته لومړيتوب ورکړي؛

۵. موږ د افغانستان له سیاستوالو غواړو، څو له طالبانو سره له خبرو وړاندې په خپل منځ کې اجماع او سوله وکړي او هوکړې ته ورسیږي؛

۶. موږ غواړو، چې بین الافغاني مذاکرات د رسنیو پر وړاندې په څرګند ډول تر سره شي او د افغانستان خلک له دې بهیر څخه معلومات ولري؛

۷. موږ د افغانستان اسلامي جمهموريت څخه غواړو، څو د دولت مرکچي پلاوي په مشرتابه کې اغیزناکه، وړ او مدیر کسان وټاکي؛

۸. موږ د طالبانو پر تحریک غږ کوو، څو د ولسواکۍ او نویو اصولو ته درناوی وکړي او د خبرو پر مهال د هغوی لخوا د اورکم د پلي کولو غوښتنه کوو؛

۹. موږ د طالبانو تحریک څخه غواړو، څو د سولې بهیر ته ژمن پاتې شي او د دې بهیر پر وړاندې د خنډونو له رامنځته کولو څخه ډډه وکړي؛

۱۰. موږ د جګړې له ښکیلو لوریو څخه د دوه اړخیز اوربند غوښتنه کوو؛

۱۱. موږ د خبرو پر مهال د حکومت او طالبانو څخه غواړو، څو له نرمښت څخه کار واخلي او د خبرو اړوند خپل حسن نیت خلکو ته څرګند کړي؛

۱۲. موږ له نړیوالې ټولنې، د سیمې او ګاونډیو هېوادونو څخه غواړو، څو په افغانستان کې خپلي نیابتي او استخباراتي جګړو ته د پای ټکی کیږدي؛

۱۳. موږ له اسلامي هېوادونو څخه غواړو، څو د افغانستان د سولې بهیر او جګړه کې له دین څخه د تاوتریخوالي له تفسیرولو څخه ډډه وکړي او له موږ سره سولې ته د رسیدو په برخه کې همکاري وکړي؛

۱۴. موږ له نړیوالې ټولنې څخه غواړو، څو د افغانستان د سولې له بهیر څخه په جدي او کره ډول څارنه وکړي؛

۱۵. موږ د نړۍ له ټولو هېوادونو څخه غواړو، چې ټولو هغو کسانو ته پناه ځایونه ور نه کړي، کوم چې په افغانستان کې جنګي جنایتونه او د بشریت ضد جنایتونه ترسره کړي وي؛

۱۶. موږ د مذاکره کوونکو څخه هیله کوو، چې د خبرو پر مهال اغیزناکې څیرې، سیاسي ګوندونه، او ټولنېزې ډلې له پامه و نه غورځوي؛

۱۷. په بدخشان ولایت کې جګړه د دې لامل شوې، چې انجونې له زده کړو بې برخې، په زوره واده شي، کرکیله له منځه تللې او د دې ولایت اقتصاد پرمختګ نه دی کړی.

۱۸. په بدخشان ولایت کې جګړه د دې لامل شوی، چې طبعیي زیرمې په غیر قانوني توګه لوټ او وویستل شي.

۱۹. جګړې په بدخشان ولایت کې د خلکو څخه روغتیايي امکانات او هوساینه اخیستي ده.

۲۰. موږ د سولې په خبرو کې د ځوانانو د اغیزناکه رول غوښتنه کوو او له ځوانانو څخه غواړو، څو له دې بهیر څخه په جدي ډول څارنه وکړي.

درنښت

د نوي نسل او ځوانانو د سولې جرګه

۱۳۹۹ لمریز کال د وږې میاشتې ۱۶ / د ۲۰۲۰ کال سپټمبر ۶

پکتیا ولایت کې د سولې لپاره د ځوانانو د اړیکو ګروپ خبري ناسته

د سولې لپاره د ځوانانو د اړیکو ګروپ، د جګړې ضد او د سولې فعالان او د ټولینزو بنسټونو استازي نن په خبري ناسته کې د بین الافغاني خبرو د ژر پیلیدو غوښتنه وکړه.

د سولې لپاره د ځوانانو د اړیکو ګروپ او د خبري ناستې ګډونوالو د افغان حکومت او طالبانو وغوښتل چې دایمي اوربند او جګړه دې ودروي.

په دې خبري ناسته کې د سولې لپاره د ځوانانو د اړیکو ګروپ او د جګړې ضد او د سولې فعلانو په نړیوالې ټولنې او افغان حکومت غږ وکړ چې د هېواد ځوانان په ځانګړي ډول د پکتیا ځوانانو ته په بین الافغاني خبرو کې ونډه ورکړي.

د سولې لپاره د ځوانانو د اړیکو ګروپ او د پکتیا فعالو ځوانانو د یو پریکړه لیک په وړاندې کولو سره له دواړو لوریو افغان حکومت او طالبانو وغښتل چې د سولې خبرې دې ژر پیل کړي.

پړیکړه لیک

د سولې لپاره د ځوانانو د اړیکو ګروپ، د جګړې ضد او د سولې فعالان، د پکتیا ولایت یو شمېر ځوانان، مدني فعالان او د ټولنیزو بنسټونو استازي د خبري ناستې په ترڅ کې، په هېواد کې د جګړې پر ښکیلو خواوو د ژر تر ژره اوربند غږ وکړ او په لاندې مواردو ټینګار وکړ

۱- د پکتیا ولایت اوسیدونکي د افغانستان د جګړې پر ښکېلو خواوو غږ کوي، څو د بین الافغاني خبرو د پیل تر څنګ دا خبرې بریالیتوب ته ورسوي او ټینګار کوي، چې مذاکراتي ټیمونه دې د دې بهیر بریالیتوب په موخه له ځانه انعطاف څرګند کړي.

۲- موږ د جګړې له ښکېلو لورو څخه غواړو، چې د بین الافغاني خبرو د پيل سره سم اوربند او یا اورکم وکړي، څو افغانانو ته د سولې د ټینګښت او جګړې پایته رسیدو لپاره د جګړې د ښکیلو خواوو هوډ څرګند شي.

۳- موږ د غونډې ګډونوال د سولې په بهیر کې پر ټولو هغو ډلو او کسانو، چې د سولې په لاره کې خنډ دي او په یو ‌‌‌‌‌‌ډول دا بهیر له ناکامی سره مخ کوي، غږ کوو، چې له دې تخریبي کړنو لاس واخلي او د سولې له دې پيل شوي بهیر څخه ملاتړ وکړي؛ که نه موږ به یې پر وړاندې په کلکه ودریږو او د دوی د دې غلطو او شریرو کړنو مخنیوی به وکړو.

۴- موږ د دې خبري ناستې ګډونوال د سولې په بهیر کې د ټولو هېوادونو له هڅو څخه د ملاتړ تر څنګ پر یادو هېوادونو غږ کوو، چې د افغانستان د سولې په بهیر کې ریښتیني اوسي او هڅه وکړي، څو دا بهیر بریالی شي.

۵- موږ د پکتیا ځوانان او اوسیدونکي پر نړیوالې ټولنې او افغان حکومت غږ کوو، څو د افغانستان د سولې بهیر کې ځوانانو ته ځانګړې پاملرنه وکړي.

۶- موږ د افغانستان له حکومت او د طالبانو له تحریک څخه غواړو، څو د بین الافغاني مذاکراتو پر مهال د افغانستان د نظام له بنسټونو څخه د ملاتړ ترڅنګ دې د دې بنسټونو د له منځه وړلو هڅه ونکړي.

درنښت

د سولې لپاره د ځوانانو د اړیکو ګروپ

د ۱۳۹۹ د وږي ۱۶ د ۲۰۲۰ سپټمبر ۶

پکتیا – افغانستان

ننګرهار کې د سولې لپاره د ځوانانو د اړیکو ګروپ خبري ناسته

په جلال آباد ښار کې د سولې لپاره د ځوانانو د اړیکو ګروپ، د جګړې ضد او د سولې فعالان، د ننګرهار ولایت یو شمېر ځوانان، مدني فعالان او د ټولنیزو بنسټونو استازو د جمعې په ورځ راټول شوي وو او د بین الافغاني خبرو د پیل تر څنګ یې پر دواړو خواو غږ وکړ، څو خبرې دې په سمه توګه ترسره او پایلې ته ورسوي.

په ننګرهار کې د سولې لپاره د ځوانانو د اړیکو ګروپ غړی هدایت الله وطندار وايي هر هغه خواوې چې د سولې پر وړاندې خنډ جوړوي او دا بهیر له ناکامۍ سره مخ کوي، موږ به يي پر وړاندې دریږو او د دوي د کړنو مخالفت به وکړو.

د دې غونډې ګډونوالو همدارنګه پر نړیوالې ټولنې او افغان حکومت غږ وکړ، چې د هېواد ځوانان په ځانګړې ډول د ننګرهار ځوانانو ته په بین الافغاني خبرو کې ونډه ورکړي.

د خبرې ناستې په پای کې د سولې لپاره د ځوانانو د اړیګو ګروپ او د جګړې ضد او سولې فعالانو د یو پریکړه لیک په وړاندې کولو سره د جګړې له ښیکلو خواو څخه د اوربند او د بین الافغاني خبرو د پیل د غوښتنې ترڅنګ د هغو هېوادونو له هڅو هم ستاینه وشوه، چې د افغانستان د سولې بهیر کې زیار ګاللی، خو ټینګار وشو، چې هیڅکله به د یادو هېوادونو ناوړه ګټې اخیستنې ته اجازه ورنکړي.

د سولې لپاره د ځوانانو د اړیکو ګروپ

د جګړې ضد او سولې فعالان

ننګرهار ــ افغانستان