Category: اعلامیې

رسنیزه اعلامیه

د سولې لپاره د ځوانانو د اړیکو ګروپ

د سولې لپاره د ځوانانو د اړیکو ګروپ، له څه باندې یوه کال راهیسې، د سولې په بهیر کې د افغانستان د نوي نسل او ځوانانو ترمنځ د همغږۍ او واحد غږ رامنځته کولو کې هلې ځلې کوي. د اړیکو ګروپ له حکومتي آدرسونو بهر د یوه خپلواک آدرس په توګه تر اوسه یې د هېواد په ۲۱ ولایتونو کې د جرګو، غونډو او کنفرانسونو په جوړولو سره د پخلاینې په بهیر کې د نوي نسل ریښتینې غږ رامنځته کولو په هڅه کې دي.

د اړیکو ګروپ د ملي پخلاینې عالي شورا د رهبري کمیټې له لومړنۍ ناستې څخه ملاتړ کوي او هیله لري، څو دا آدرس پیاوړی شي او د هېواد ملي ګټو په پام کې نیولو سره، د افغانستان اسلامي جمهوریت او د طالبانو د تحریک ترمنځ سولې بهیر چټک کړای شي.

د اړیکو ګروپ د سولې په بهیر کې د افغانستان د ځوانانو د ننګ یا عدالت غوښتنې د محور او واحد غږ په توګه، د پخلاینې په بهیر کې د نوي نسل او ځوانانو د ګډون او د ملي اجماع رامنځته کولو او په دې شورا کې ټول شموله جوړښت د رامنځته کولو غوښتنه کوي.

په درنښت

د سولې لپاره د ځوانانو د اړیکو ګروپ

د ۱۳۹۹ لمریز کال د لیندۍ ۱۵ / د ۲۰۲۰ زیږدیز کال د ډسمبر ۵

پر فوزیه کوفي د برید په تړاو د سولې لپاره د ځوانانو د اړیکو ګروپ مطبوعاتي اعلامیه

شنبه د ۱۳۹۹ لمریز کال د زمري ۲۵ / د ۲۰۲۰ زیږدیز کال د اګسټ ۱۵

د سولې لپاره د ځوانانو د اړیکو ګروپ د سولې د مرکچي پلاوي پر غړې آغلې فوزیه کوفي برید په کلکو ټکو غندي او دا پر سولې د افغانستان د دښمنانو برید ګڼي او خپله خواخوږي له اغلې کوفي سره شریکوي.

تېره ورځ پر میرمن کوفي د پروان – کابل پر لویه لار برید شوی، چې له بده مرغه په دې برید کې میرمن کوفي ټپي شوې ده، د سولې لپاره د ځوانانو د اړیکو ګروپ؛ میرمن کوفي ته د خدای تعالی له دربار څخه د بشپړې روغتیا دعا کوي.

میرمن کوفي د هېواد یوه سیاسي فعاله او زړوه ښځه ده، چې اوسمهال د افغان حکومت لخوا له طالبانو سره د سولې په مرکچي پلاوي کې غړیتوب لري. د سولې لپاره د ځوانانو د اړیکو ګروپ د سولې بهیر کې د نوموړې شتون مهم ګڼي.

دا چې افغان حکومت او طالبان بین الافغاني مذاکراتو ته نېږدې شوي، له همدې امله د سولې ضد او یو شمېر ترهګرۍ کړۍ هڅه کوي، څو د سولې بهیر له خنډ او ځنډ سره مخ کړي، نو له همدې امله د سولې لپاره د ځوانانو د اړیکو ګروپ د افغان حکومت، طالبانو تحریک او د نړیوالې ټولنې څخه غواړي، څو د سولې مرکچي پلاوي د امنیت په ټینګښت کې کوټلي ګامونه اوچت کړي او موږ د افغانانو ترمنځ د سولې خبرو لیدونکي و اوسو.

په درنښت

د سولې لپاره د ځوانانو د اړیکو ګروپ

کابل ــ افغانستان

د جگړې ضد او د سولې یو شمېر فعالانو او د سولې لپاره د ځوانانو د اړیکو د ګروپ اعتراضي اعلامیه

«د بین الافغاني خبرو لپاره د سولې مرکچي پلاوي د پنځه تنو غړیو د استعفا غوښتنه»

د سولې خبرې او بین الافغاني مذاکرات د افغانستان ملت لپاره یو برخلیک ټاکونکی بهیر او زیات اهمیت لري. نو په دې ډول د افغانستان خلک د حکومت او په دې بهیر کې ښکیلو خواوو تمه لري، څو د بین الافغاني مذاکراتو او خبرو په مرکچي پلاوي کې داسې څیرې شتون ولري، چې لږ تر لږه د بیلابیلو خلکو سره د خبرو لپاره کاري فرصت او د غوره استازولۍ وړتیا ولري. دا په داسې حال کې ده، چې د سولې مرکچي پلاوي یو شمېر غړي، په عین وخت کې ګڼ شمېر مسوولیتونه پر مخ وړي او د دې اړین او مهم بهیر لپاره کافي فرصت نه لري. له دې ډلې څخه:

۱. د مالیې وزارت سرپرست او نوماند وزیر، عبدالهادي ارغندیوال؛

۲. د اداري اصلاحاتو او ملکي خدمتونو د کمیسیون رئیس احمد نادر نادري؛

۳. په سیاسي او ولسي چارو کې د ولسمشر ستر سلاکار عبدالمتین بیګ؛

۴. په دیني چارو کې د ولسمشر ستر سلاکار عنایت الله بلیغ؛

۵. په ټولنییزو چارو کې د ولسمشر ستر سلاکار محمد رسول طالب؛

هغه کسان دي، چې د سولې ۲۱ کسیزه مرکچي پلاوي کې د غړیتوب سربېره، حکومتي رسمي دندې هم پر مخ وړي. له همدې امله موږ د جګړې ضد او سولې فعالانو او د سولې لپاره د ځوانانو د اړیکو ګروپ، تر هرڅه وړاندې په جدیت سره له دې کسانو څخه غواړو، څو له دې مهم او برخلیک ټاکونکي وضعیت څخه د پوهاوي او د وطن پالنې احساس سره په مسوولانه ډول له یادو مسوولیتونو څخه له یوه څخه استعفا وکړي او له حکومتي چوکۍ او یا هم د سولې خبرو د مرکچي پلاوي څخه یو وټاکي او په دویم ګام کې له ولسمشر او د هېواد د ملي مصالحې د عالې شورا له رئیس څخه غواړو، څو  ژر تر ژره د یادو پنځو کسانو برخلیک په اړه، چې په حکومت کې پاتې کیږي او یا هم د سولې خبرو په مرکچي پلاوي کې، باید پریکړه وکړي.

ومن الله توفیق

د جګړې ضد او د سولې فعالان

د سولې لپاره د ځوانانو د اړیکو ګروپ

د ۱۳۹۹ د چنګاښ ۷ / د ۲۰۲۰ د جون ۲۷