Tag: افغانستان

د اړیکو ګروپ رهبري د کندهار ولایت مدني ځوانانو بنسټ سره وکتل

د ۱۳۹۹ د سلواغې په ۱۸ نېټه د اړیکو ګروپ رهبري د کندهار ولایت مدني ځوانانو بنسټ سره وکتل او د  کندهار ولایت د نوي نسل او ځوانانو د سولې جرګې د جوړېدو پرڅرنګوالي، چې په پام کې ده ډېره ژر جوړه شي، خبرې او نظرونه شریک کړل.

د سولې لپاره د ځوانانو د اړیکو ګروپ رهبري د سولې عامه کتابون څخه لیدنه وکړه

د ۱۳۹۹ د سلواغې ۱۵ د چهارشنبې په ورځ د سولې عامه کتابتون مسوول منور احمد واحدي سره وکتل او د کندهار ولایت د نوي نسل او ځوانانو  جرګې د جوړولو پر څرنګوالي، چې په پام کې ده ‌‌‌‌‌‌ډېر ژر د دې ولایت د ټولو اداري واحدونو ځوانانو په حضور کې جوړه شي، بحث او  نظرونه شریک کړل.

د جګړې ناوړه اغېزې او د سولې شته فرصتونو د خبري کنفرانس پرېکړه لیک

د افغانستان د جګړې اوږدېدل په هیواد کې د ګڼ شمېر ټولنیزو او اقتصادي بنسټونو د له منځه تلو لامل شوی او د هیواد رغونه او پرمختګ یې سلګونه کلونه شاته کړی دی.

د دې ترڅنګ د دې له ویجاړونکې جګړې زغمل زموږ د باعزته خلکو لپاره نه جبرانېدونکی دی، خو سربېره پر دې زموږ هیوادوال سولې ته هیله مند دي او په هیواد کې د سولې راتک ته له رامنځته شوي فرصت څخه ملاتړ کوي.

موږ د هرات ځوانان په هيواد کې د جګړې پای او د سولې ټینګښت ترڅنګ د لاندې مواردو غوښتنه کوو:

1.د طالبانو له تحریک څخه غواړو، څو د جګړې پر مهال عامه بنسټونه په نښه نه کړي او دا ودانۍ د افغانانو د ملي پانګې په توګه وپیژني.

2.تر څو لسیزو جګړې وروسته اوس د افغانانو لپاره د سولې د ټینګښت وړ فرصت رامځته شوی، موږ له حکومت او طالبانو څخه په جدي ډول غواړو، څو د سولې ټینګښت او د جګړې د پایته رسیدو په تړاو له رامنځته شوي فرصت څخه ګټه پورته کړي.

3.د افغانستان حکومت او د طالبانو د تحریک رهبران باید د دواړو اړخونو د سیاسي او نظامي مشرانو په منځ کې د یوې ملي لویې اجماع د جوړېدو لپاره هڅې وکړي، څو په هیواد کې نور د خونړۍ او ناتمامې جګړې څخه مخنیوی وشي.

4.د طالبانو تحریک باید په ولسواليو خپل یرغلیز بریدونه، چې د سولې بهیر د ګډوډېدو لامل شوی بند کړي او د دواړو لورو مرکچیانو څخه غواړو، څو په عاجل ډول د سولې خبرو ته را وګرځي.

5.موږ له نړیوالې ټولنې، د سیمې له هیوادونو او د سولې په بهیر کې نورو ښکېلو هیوادونو څخه غواړو، څو د دې بهیر په بریالیتوب او د سولې خبرو او په افغانستان کې د سراسري اوربند په ټینګیدو کې ریښتینې همکاري وکړي، بې له دې به په افغانستان کې د جکړې دوام د ګاونډیو او سیمې هیوادونو لپاره هم جدي تاوانونه واړوي.

په درنښت

د هرات د نوي نسل او ځوانانو د سولې جرګې سکرتریت

د سولې لپاره د ځوانانو د اړیکو ګروپ

هرات – افغانستان

۱۴۰۰د چنګاښ ۱۸/ ۲۰۲۱جولای ۷

د جګړې زیاتوالی او د سولې خبرو پر وړاندې د خنډونو په تړاو اندېښنې د خبري کنفرانس اعلامیه

موږ د سولې یو شمېر فعالانو او ځوانانو د هرات ولایت د نوي نسل او ځوانانو د سولې جرګه کې، چې د ۱۳۹۹ لمریز کال د لیندۍ میاشتې په لومړۍ نېټه په دې ولایت کې د سلګونو ځوانانو په ګډون د سولې لپاره د ځوانانو د اړیکو ګروپ لخوا جوړه شوې وه، ګډون کړی وو. موږ د سولې په بهیر کې د حکومتي او شخص محوره برنامو څخه بهر، نوی نسل او ځوانان منسجم او همغږي کوو او د سولې هوکړې پلي کېدو او په هیواد کې د جګړې پایته رسیدو او د سوله ییزې فضاء جوړیدو، ملي روغې جوړې او يو بل منلو لپاره کار او فعالیت کوو.

موږ د هرات ولایت نوی نسل او ځوانان د جګړې زیاتوالی او د سولې خبرو پر وړاندې د خنډونو په تړاو خپلې اندېښنې د جګړې دواړو اړخونو (د افغانستان حکومت او طالبانو تحریک) او نړیوالې ټولنې سره په لاندې ډول شریک کوو:

1.  موږ د جګړې له دواړو لورو په ځانګړې ډول د طالبانو له اسلامي تحریک څخه غواړو، څو د مذاکرې مېز ته را وګرځي او جدي او برخلیک ټاکوونکي مذاکرات ژر تر ژره پیل کړي.

2. موږ د طالبانو له تحریک او د افغانستان له حکومت څخه غواړو، څو ژر تر ژره اوربند وکړي او یا هم لږ تر لږه تاوتریخوالي پر کمیدو او د خلکو د زیاتې قربانۍ څخه د مخنیوي په موخه هوکړه وکړي.

3. موږ د جګړې له دواړو لورو غواړو، چې هېڅ یو لوری پر لوري د بریالیتوب په فکر کې ونه اوسي. په هیواد کې د جګړې د ختمېدو یوازینۍ حل لاره د د جګړې د ښکیلو اړخونو ترمنځ خبرې او سیاسي هوکړه ده.

4. موږ د افغانستان له حکومت او سیاستوالو څخه غواړو، څو د خبرو لپاره د واحد صف جوړېدو ترڅنګ، خپلو دریځونو کې نرمښت وښيي او په هیواد کې د تلپاتې او سراسري سولې د راتلو لپاره قربانۍ ته چمتو شي.

5. همدارنګه موږ له طالبانو هم غواړو، څو پر خپل دریځ باندې له زیات ټینګار څخه ډډه وکړي او سولې ته د رسېدو او د جګړې پایته رسیدو لپاره نرمښت وښيي.

6. موږ د امنیتي او دفاعي ځواکونو او د نظام د بنسټیزو ستنو د فعالیت د دوام او ساتنې څخه د ملاتړ تر څنګ په دې باور یو، چې یوازې سیاسي هوکړې کولای شي، چې د راتلونکې لارې نقشه مشخصه کړي، نه د جګړې پر دوام ټینګار.

7. موږ له دواړو لورو څخه په ډېر درنښت غواړو، چې یو بل لوري ته له تندو، سختو، سپکاوي، او نفاق اچوونکو کلیمو له کارولو څخه ډډه وکړي او د یو بل منلو او د سیاسي هوکړو زمینه برابره کړي.

8. موږ په کابل او نورو ولایتونو کې هدفي وژني یو جنایتکارانه عمل ګڼو. د جکړې زیاتیدو او د افغان وګړو قرباني کېدل د یوې اوږدې جګړې لپاره زمینه برابروي او موږ له هوکړو او تلپاتې او سراسري سولې څخه لرې کوي. په دې توګه موږ د افغاستان حکومت، د طالبانو تحریک او اسلامي هیوادونو څخه غواړو، څو د سولې خبرې چټکې او بریالۍ کړي.

9. له نړیوالې ټولنې په ځانګړې ډول د امریکا له متحده ایالاتونو او اسلامي هیوادونو څخه غواړو، څو هوکړې ته د دواړو لورو رسېدو لپاره عاجل او اړین فشارونه وکاروي.

موږ ځوانان، د سولې فعالان او د هرات ولایت د نوي نسل او ځوانانو د سولې جرګې مسؤلین د بین الافغاني مذاکراتو د سیاسي هوکړې پورې د سولې په بهیر کې د د نوي نسل، ځوانانو او د ښځو د اغیزناکه ونډې، مشارکت او ګډون پورې خپل سوله غوښتونکي فعالیت دوام ته ژمن یو.

درنښت

د هرات د نوي نسل او ځوانانو د سولې جرګه

د سولې لپاره د ځوانانو د اړیکو ګروپ سکرټریت-هرات

د ۱۳۹۹ کال د سلواغې ۱۶ / د 2021 د فبروري 4

د هرات د نوي نسل او ځوانانو د سولې جرګې د غړیو ناسته

د نوي نسل او ځوانانو د سولې جرګې د غړیو ناسته، د جرګې د جوړنکیو غړیو، د کمیټو د رئیسانو، منشیانو او د هرات ولایت د فعاله ځوانانو په ګډون جوړه شوه. د غونډې ګډونوالو پر راتلونکیو پروګرامونو، طرحو او د سولې بهیر کې د ځوانانو د ونډې پر څرنګوالي خبرې وکړې.

په ټولیز ډول په دې ناسته کې د لاندې شپږو موضوع ګانو اړوند پریکړې وشوې:

۱. دا ډله باید له پخوا څخه پیاوړې عمل وکړي او د هرات او پلازمینې ځوانانو ترمنځ اړیکې ټینګې کړي؛

۲. د هرات د نوي نسل او ځوانانو د سولې جرګې د ستونزو په اړه خبرې وشوې او پریکړه وشوه، چې د ځوانانو د سولې جرګه، چې ټاکل شوې په نیږدې راتلونکي کې د زون په کچه په دې ولایت کې جوړه شي، په بریالیتوب سره جوړه شي؛

۳. په راتلونکي جرګه کې د جګړې قربانیانو نظرونه باید ډیر منعکس شي او په فعالانه ډول ونډه ولري؛

۴. د زیاتو خلکو د خبرولو او په ډله ایز ډول د خپریدو په موخه د هرات د نوي نسل او ځوانانو د سولې جرګې پریکړه لیک دې چاپ او د ولسوالیو په کچه دې خلکو ته ورسیږي؛

۵. د سولې په مذاکراتو کې د ځوانانو ونډې د عدالت غوښتنې او فعاله ګډون لپاره، د هرات د مخورو سره ناستې او کتنې زیاتې شي؛

۶. د سولې په بهیر کې د هرات د ځوانانو د نظرونو د منعکس کولو لپاره دې ډیر ژر په پر لیکه ډول له مذاکراتي پلاوي سره ویډیويي ناسته جوړه شي.

د هرات د نوي نسل او ځوانانو د سولې جرګه د سولې لپاره د ځوانانو د اړیکو د ګروپ لخوا د ۱۳۹۹ لمریز کال د لیندۍ میاشتې په ۱ نیټه د دې ولایت د ټولو اداري واحدونو څخه د سلګونه ځوانانو په ګډون جوړه شوې وه.

د هرات د نوي نسل او ځوانانو د سولې جرګه

هرات – افغانستان

د ۱۳۹۹ د مرغومې ۱۰ / د ۲۰۲۰ د ډسمبر ۳۰

مشورتي ناسته - بلخ

د اړیکو د ګروپ مشرتابه د بلخ ولایت د نوي نسل او ځوانو د سولې جرګې له جوړونکي ټیم، د لسګونو کمیټو د رئیسانو او منشیانو سره مشورتي ناسته وکړه.

په دې ناسته کې د سولې لپاره د ځوانانو د اړیکو ګروپ له فعالیتونو څخه راپور وړاندې شوو او د جرګې د غړیو ترمنځ د زیاتې همغږۍ په موخه وړاندیز وشو، څو د بلخ د نوي نسل او ځوانانو د سولې جرګې سکرتریت رامنځته او په دې ولایت کې راتلونکي پروګرامونه او فعالیتونه جوړ او پراخه شي.

د ناستې اعلامیه

۱‌‌. د جوزجان ولایت خلکو د جګړې د زیاتوالي په هکله اندېښنه وښوده او له ټولو لورو څخه غواړي تر څو جګړې او وینې بهونې ته د پای ټکی کيږدي.

۲. ټول لوري د سولې د راتلو لپاره د لاسته راغلي موقع څخه ګټه واخلي او د هغې د ټینګښت لپاره هڅه وکړي.

۳. په افغانستان کې د سولې خبرې اترې د جګړې د پای ته رسولو لپاره زمینه برابره او هر څه ژر د جګړې د زیاتوالي مخنیوی وکړي.

۴. جګړه هېڅ ستونزه نشي حل کولای برعکس د جګړې د تکرار سبب کیږي او د سولې د تحقق په موخه باید غیر عملي شرطونه غاړې ته شي.

۵. د سیمې او نړۍ هیوادونه باید په افغانستان کې د دې بهیر د بریالیتوب لپاره خپلې هڅې ممکنه لوړې کچې ته پورته کړي.

۶. د حکومت او طالبانو د تحریک ترمنځ هر ډول هوکړه د ټولو افغانانو له هغې ډلې څخه د ښځو، ځوانانو او لږکیو د حقونو څخه ملاتړ وکړي.

۷. د استانبول ناستې ګډونکوونکي د سملاسي اوربند د پلي کېدو لپاره هڅه وکړي او دا هڅې په هیواد کې د سولې د تحکیم لپاره زمینه برابره او سبب شي.

۸. هر ډول تروریستي کړنې په کلکه غندو او هر یو زمونږ د هیواد د مسوول وګړي په توګه د تلپاتې سولې ته د رسېدو لپاره هڅه وکړو.

۹. د دواړو لورو له مذاکراتي پلاوي څخه غواړو تر څو ژر په استانبول کې د سولې مذاکراتو ناسته پیل او د افغانستان خلک د هغو مثبتې پایلې لیدونکي وي.

۱۰. د سولې مرکچیان د جوزجان ځوانانو سلا مشورو او تصمیم ته درناوی ولري او د سولې په خبرو کې طرحې په پام کې ونیسي.

۱۱.  د لویو لارو ناامني د جوزجان د خلکو د لویو اندېښنو څخه ده او سملاسي اوربند او سوله به د لویو لارو د امنیت سبب او پوره امنیت به ټینګ شي.

۱۲. طالبانو په خپله بیانیه کې د اختر درې ورځې اوربند اعلان کړ او مونږ دا تصمیم هیله بښوونکی او د سولې لپاره پیل ګڼو او له هغه څخه ګرم استقبال کوو.

په درنښت

د اړیکو ګروپ د رسنیو او ویاندوی دفتر

د جوزجان ولایت د نوي نسل او ځوانانو د سولې جرګې ولایتي سکرتریت

د ۱۴۰۰ کال د غويي ۲۰ - د ۲۰۲۱ کال د مې ۱۰

د جوزجان د مدني ټولنو ، قومي مشرانو او ځوانانو د ګډې غونډې #پریکړه لیک

"په هیواد کې اوربند او تل پاتې سوله"

۱- موږ له حکومت او طالبانو له تحریک څخه غواړو، څو د خبرو میز ته را وګرځي او خپلې ستونزې د تفاهم او سیاسي لارې حل او دې ویجاړونکي جګړې ته د پای ټکی کېږدي.

۲- موږ د جګړې په ښکیلو خواو غږ کوو چې پایلې ته د سولې د خبرو رسیدو پورې، په ټول هیواد کې اوربند اعلان کړي او په ارامه چاپیریال کې د سولې خبرې پیل کړي.

۳- موږ پر ملکي وګړو، ماشومانو، ښځو، زده کونکو، ډاکټرانو، د مدني فعالانو، خبریالانو او دیني عالمانو بریدونه او د هغوی وژل په کلکه غندو.

۴- د عامه تاسیساتو، پلونو او پلچکونو، زیارتونو، ښوونځیو او روغتونونو ویجاړول باید له هر ډول ځنډ پرته ودریږي.

۵- موږ له دواړو اړخونو (حکومت او طالبانو) څخه غواړو، څو د ترکیې او یا هم نورو ناستو کې ژر تر ژره خپل ګډون اعلان او په هېواد کې د تل پاتې سولې ټینګښت لپاره ریښتینې هڅې وکړي.

په درنښت

د جوزجان ولایت ځوانانو او مدني بنسټونه، قومي مشران

د ۱۴۰۰ کال د غبرګولي ۳۰ / د ۲۰۲۱ کال د جون ۲۰

د میدان وردګو ولایت د خلکو او ځوانانو غونډه

#پریکړه‌لیک

د میدان، وردګو او بهسودو خلکو او ځوانانو د پنجشنبې په ورځ د ۱۴۰۰ لمریز کال د وري په ۱۹ نیټه، چې د ۲۰۲۱ زیږدیز کال د اپریل له ۸ سره برابره ده، په میدان وردګو ولایت کې د سولې بهیر او په دې بهیر کې د میدان، وردګو او بهسودو خلکو او ځوانانو غوښتنې، ترسرلیک لاندې په جوړه شوې غونډه کې خپلې غوښتنې په دې ډول بیان کړې:

۱. که هر نظام وي، خو نظام او پوځ دې وساتل شي.

۲. د میدان وردګو ولایت ځوانانو ته دې د سولې په بهیر کې رغنده رول ورکړل شي.

۳. د اسلام مبارک دین په چوکاټ کې د ښځو د حقونو په ګډون، ټولنییز او بشري حقونه دي خوندي شي.

۴. د بیان آزادي، په ځانګړي ډول د رسنیو آزادي دې خوندي شي.

۵. د افرادو تغییر او تبدیل مهم نه دی، خو داسې سوله دې وشي، چې د بلې جګړې د پیل لامل نشي.

۶. داسې میکانیزم دې جوړ شي، چې ټول خلک په کې خپل ځان وویني.

۷. داسې سوله دې وشي، چې مدیران یې د یو ځانګړي قوم او ډلې پورې اړوند نه وي.

۸. د سرتاسري سولې لپاره باید له ټولو خلکو نظرونه واخیستل شي.

۹. تیرې لاسته راوړنې دې وساتل شي.

۱۰. تر هرڅه وړاندې سرتاسري اوربند باید وشي.

۱۱. دواړه لوري باید نرمښت وښيي.

و من الله التوفیق

د میدان وردګو ولایت د خلکو او ځوانانو غونډه

د ۱۴۰۰ د وري ۱۹ / د ۲۰۲۱ د اپریل ۸

میدان ښار – افغانستان

د غونډې پرېکړه‌لیک

د سولې بهیر او د نورستان ولایت د خلکو، عالمانو او ځوانانو غوښتنې

د سولې لپاه د ځوانانو د اړیکو ګروپ په همکاري مونږ د نورستان ځوانانو «د سولې بهیر او د نورستان ولایت د خلکو، عالمانو او ځوانانو غوښتنې» تر عنوان لاندې غونډه د ۱۴۰۰ د زمري په ۹ ، چې د ۲۰۲۱ د جولای له ۳۱ نېټې سره برابرده، د دې ولایت په مرکز کې جوړه کړه.

مونږ د قران کریم متبرک ایات څخه په اقتباس او الهام (فَاتَّقُوا اللَّهَ وَأَصْلِحُوا ذَاتَ بَيْنِكُمْ / وَالصُّلحُ خَیْرٌ/ وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا) د محدثینو، مفسرینو او د اسلامي فقهې عالمانو، چې د مسلمانو ورونو ترمنځ د سولې او پخلاینې بیانوونکي دي، اوربند او د هیواد جګړې پای د خبرو اترو او سیاسي هوکړې له لارې د افغانستان د کړکېچ د حل په توګه پیژنو او د لاندې مواردو غوښتونکي یو:

1. د وروستۍ څلویښت کلنې خونړۍ او بدمرغې جګړې، چې بغیر له وراني، کډوالي او دربدري یې بل څه مونږ افغانانو او په ځانګړې توګه ځوانانو ته ندي پریښي، په پرېکنده ډول ودریږي او یو نظام او سوله ییزه ټولنه د ټولنې د ټولو قشرونو د حقونو ساتنې لپاره رامنځته شي.

2. له دواړو لورو (حکومت او طالبانو) د بې قید او شرطه تلپاتې اوربند غوښتونکي یو.

3. د سولې مذاکراتو عاجل پیل؛ مهمو او برخلیک ټاکوونکو مسایلو ته پاملرنه.

4. مونږ د نورستان ځوانان د مذاکرې له دواړو لورو څخه غواړو، چې ملي شتمنیو ته درناوی ولري او شخصي، فرمایشي او ځان غوښتنې څخه تېر او د سولې په یوې ټولیزې هوکړې، هوکړه وکړي.

5. مونږ د نورستان ځوانان د مذاکرې له دواړو لورو څخه غواړو د دوحې او یا د بل بهرني هیواد پر ځای د افغانستان له ولایتونو څخه یو، چې د جرګو تاریخ ولري غوره او هر څه ژر د سولې مذاکرې پیل او په پرېکنده ډول یې پرمخ یوسي.

6. ځای، منصب، نفوذ او قدرت د یو افغان د وینې بهیدو ارزښت نلري، دواړه لوري په ځانګړې توګه طالبان باید په عاجل ډول له جګړې څخه لاس واخلي او دې ورور وژنې ته د پای ټکی کیږ دي.

7. د افغانستان اساسي قانون، چې په نړۍ کې یو له غوره اسلامي قوانینو څخه دی، باید له منځه لاړ نشي، تعدیل یې باید د افغانستان د خلکو د ارادې پر بنسټ تر سره شي.

8. د سولې بهیر کې باید تول دخیل وي، چې د ټولنې ټول قشرونه باید خپل موجودیت حس کړي او قومي او مذهبي اقلیتونه باید په هغې کې دخیل وي.

9. مونږ د سولې په هوکړه کې د اسلامي شریعیت او نړۍ والو موازینو او قوانینو په رڼا کې د ښځو او ماشومانو د حقونو د تضمین غوښتونکي یو.

10. د جګړې په ډګر کې دواړه لوري په ځانګړې توګه طالبان د عامه او شخصي تاسیساتو او له عامه او د خلکو له منقولو او غیر منقولو شتمنیو له ړنګولو څخه ډډه وکړي.

11. مونږ د نورستان ځوانان په قضیه کې له ښکېلو لورو څخه د جګړې په ډګر کې د اسلامي شریعت ضوابطو د نړۍ والو بشردوستانه حقونو- د وسله والو مخاصماتو حقونو په پام کې نیولو غوښتونکي یو.

12. مونږ د نورستان ځوانان غواړو تر څو د وروستیو دوه لسیزو لاسته راوړنو، چې په هغه کې زمونږ د هیواد افغانستان ارامي پکې وي او د محمدي غرا شریعت سره په ټکر او تضاد کې نه وي ساتل، ملاتړ، تکمیل او دوام ومومي.

13. مونږ د نورستان ځوانان د سیمې او ګاونډیو پیاوړو هیوادونو څخه غواړو، چې افغانستان د خپلو نیابتي جګړو په ډګر تر دې څخه زیات بدل نکړي. با ثباته افغانستان کولای شي د سیمه ییز او نړۍ وال پرمختګ ضامن شي.

په درنښت

د نورستان ولایت خلک، عالمان او ځوانان

۱۴۰۰ د زمري ۹/ د ۲۰۲۱ د جولای۳۱